Siyasi Menecment İnstitutunun həbsdə olan direktoru Azər Qasımlının ittiham olunduğu cinayət işi üzrə məhkəmə istintaqı yekunlaşıb.

Fevralın 11-də Bakı Ağır Cinayətlər Məhkəməsində hakim Telman Hüseynovun sədrlik etdiyi prosesdə əvvəlcə müdafiə tərəfinin vəsatəti əsasında, A.Qasımlını hədə-qorxuda ittiham edən Qurbanəli Yusifovun keçmiş həyat yoldaşı Fərəhbanu Yusifovanın məhkəməyə gətirilməsi məsələsi müzakirə olunub. 

Əvvəlki prosesdə məhkəmə müdafiə tərəfinin F.Yusifovanın məhkəməyə məcburi gətirilməsi barədə vəsatətini təmin etsə də, o, yenə məhkəməyə gətirilməyib. 

Məhkəmədə polisin onu tapa bilmədiyi elan olunub və buna görə də F.Yusifovanın adı şahidlər siyahısından çıxarılıb. A.Qasımlı qərara etiraz edib. 

"Azərbaycan polisi kimi istəsə tapıb məhkəməyə gətirə bilər. Belə çıxır ki, istənilən şahid məhkəməyə gəlməkdən imtina edə bilər?", - o sual edib. 

Müdafiə tərəfinin tələbi ilə iclasda elektron sistemdə Q.Yusifovun keçmiş həyat yoldaşından boşanma tarixçəsinə baxılıb. Məlum olub ki, Q.Yusifov həyat yoldaşından 2022-ci ilin yanvarında, öz ərizəsi əsasında boşanıb. 

Müdafiə tərəfi məhkəmənin diqqətinə çatdırıb ki, Q.Yusifov istintaqa ifadəsində A.Qasımlının onu 2022-2023-cü illərdə təhdid etdiyini, buna görə də "ailəsini dağıtdığını" iddia edib. Boşanmanın 2022-ci ilin yanvarında və məhz Q.Yusifovun istəyi ilə baş verməsi isə bu iddianın yanlış olduğunu göstərib. 

Daha sonra dövlət ittihamçısı çıxış edib. O, Azər Qasımlının hədə-qorxu gəldiyinin məhkəmədə sübut olunduğunu deyib və siyasətçinin 13 il müddətinə azadlıqdan məhrum edilməsini təklif edib.

Prosesdə zərərçəkən şəxs qismində tanınan Qurbanəli Yusifov prokurorun çıxışı ilə razılaşdığını bildirib. Müdafiə tərəfi çıxış üçün vaxt istəyib.

Azər Qasımlı 2024-cü ilin dekabrından həbsdədir. O, Cinayət Məcəlləsinin 182.3.2-ci maddəsi (hədə-qorxu ilə tələb etmə, külli miqdarda əmlak əldə etmək məqsədilə törədildikdə) ilə ittiham olunur.

Siyasətçi ittihamı rədd edir və həbsinin ictimai-siyasi fəaliyyəti ilə əlaqəli olduğunu bildirir.

Azər Qasımlının həyat yoldaşı Samirə Qasımlı daha əvvəl “Toplum TV”-yə bildirib ki, Q.Yusifovun siyasətçiyə borcu olub, lakin borcun qaytarılması üçün ona hədə-qorxu gəlinməyib.

“2020-ci ilin mayında Yusifov Azər Qasımlının istəyilə onun adına kriptovalyuta saytında hesab açıb və onu idarə edib. Həmin ilin may və avqust aylarında A.Qasımlı ona ümumilikdə 20,000 ABŞ dolları verərək iki ‘bitcoin’ almasını istəyib. Biz sonradan aşkar etdik ki, o, ‘bitcoin’lərin birini alıb, digərini isə almayıb. Sonradan isə bizə hələ də qaranlıq qalan səbəblərdən A.Qasımlının hesabındakı bir ‘bitcoin’ də yoxa çıxdı”, - o bildirib.

S.Qasımlının sözlərinə görə, 2022-ci ilin yanvarında Q.Yusifov və həyat yoldaşı borcun aylıq hissələrlə qaytarılması barədə razılığa gəliblər və Q.Yusifov bununla bağlı qəbz də imzalayıb.

Lakin sonradan Q.Yusifov ölkəni tərk edib və A.Qasımlı ilə əlaqəni kəsib. Bundan sonra siyasətçi məhkəməyə müraciət edib və 2024-cü ilin aprelində Mingəçevir Şəhər Məhkəməsi A.Qasımlının xeyrinə qərar çıxarıb.