Yanvarın 26-da Bakı Ağır Cinayətlər Məhkəməsində hüquq müdafiəçisi Rüfət Səfərovun işi üzrə növbəti məhkəmə prosesi keçirilib. 

"Azadlıq Radiosu"nun xəbərinə görə, prosesdə zərərçəkmiş qismində tanınan, R.Səfərovu ona xəsarət yetirməkdə ittiham edən Natiq İmanquliyev müdafiə tərəfinin suallarını cavablandırıb.

R.Səfərovun vəkillərindən biri "zərərçəkən"dən xəsarət aldığı halda, niyə müvəkkilinin əlində heç bir iz qalmadığını soruşub. N.İmamquliyev bu suala cavab verə bilməyib. 

N.İmanquliyev vəkillərin suallarına cavab olaraq deyib ki, iddia olunan insidentdən sonra xəstəxanada müayinədən keçməyib. Vəkil Elçin Sadıqov məhkəmənin diqqətinə çatdırıb ki, N.İmamquliyev tibbi müayinədən keçmədiyini etiraf etdiyi halda, onun xəsarət aldığı ilə bağlı tibbi rəy hazırlanıb.

Müdafiə tərəfinin zərərçəkmişə gəlir mənbəyi barədə sual verməsi isə prosesdə səs-küyə səbəb olub. 

Cinayət işində iddia olunur ki, N.İmanquliyev torpaq sahəsi almaq məqsədilə R.Səfərova 120 min manat pul versə də, ona nə torpaq satılıb, nə də pulu geri qaytarılıb. 

"Deyirsiniz ki, əvvəl 60 min manat verib torpaq sahəsi almısınız, sonra yenə də torpaq almaq üçün Rüfət Səfərova daha 60 min vermisiniz. Fəhlə adamsınız, qısa müddətdə 120 min manat sizdə haradan idi?", - vəkil Rövşanə Rəhimli "zərərçəkmiş"dən soruşub. 

Dövlət ittihamçısı Vüsal Mehrəliyev sualın cinayət işinə aidiyyəti olmadığını əsas gətirərək onun iş materiallarına salınmamasını istəyib. R.Səfərov buna etiraz etdikdə prokuror sualın qanunsuz olduğunu deyib. 

"Qanunsuzluq bilirsiniz nədir? Qanunsuzluq təqsirsiz adamı həbs etməkdir. Qanunsuzluq saxta ittihamı müdafiə etməkdir. Özünüz də yaxşı bilirsiniz ki, onun nəinki 120 mini, heç 120 manatı yoxdur. Mənə nəinki pul verməyib, məni heç görməyib. Yenə də bu ittihamı müdafiə etməyi özünüzə sığışdırırsınız", - deyə R.Səfərov prokurora cavab verib. 

"Bunları dəli edən budur ki, necə ola bilər, hakimiyyətin qurulmasında birbaşa xidmətləri olan bir insanın övladı ‘asi’ çıxır, etiraz edir?! Bunu mənə bağışlamadılar. 10 il ərzində dəfələrlə həbs etdilər, özümün, ailə üzvlərimin başına elə iyrənc işlər gətirdilər... Açığı, mən bu qədərini gözləmirdim", - o, çıxışında əlavə edib. 

R.Səfərovun atası E.Sabiroğlu keçmiş deputat və Müdafiə Nazirliyinin mətbuat xidmətinin keçmiş rəisi olmaqla yanaşı, Yeni Azərbaycan Partiyasının qurucularından biridir. 

2024-cü il dekabrın 3-də saxlanılan Rüfət Səfərova qarşı Cinayət Məcəlləsinin 178.3.2 (dələduzluq, külli miqdarda ziyan vurmaqla törədildikdə), 127.2.3-cü (qəsdən sağlamlığa az ağır zərər vurma)  və 221.1 (xuliqanlıq) maddələri ilə ittiham irəli sürülüb.O, ittihamları rədd edir, həbsinin siyasi sifariş olduğunu bildirir.

Əvvəllər Zərdab Rayon Prokurorluğunda müstəntiq işləyən R.Səfərov 2015-ci ildə işdən çıxaraq, hökuməti tənqid etmişdi. Bundan sonra o, doqquz il müddətinə həbs edilsə də, 2019-cu ildə əfv edilərək azadlığa çıxmışdı. O, Müdafiə Xətti insan hüquqları təşkilatının rəhbəri kimi fəaliyyət göstəriridi.