Martın 13-də Ali Məhkəmədə “Abzas Media"nın həbsdə olan direktoru Ülvi Həsənlinin kassasiya şikayətinə baxılıb.

"Abzas Media"nın xəbərinə görə, hakim Zaur Hüseynovun sədrliyi ilə keçirilən prosesdə əvvəlcə təqsirləndirilən şəxsin vəkili Fəxrəddin Mehdiyev çıxış edib. Vəkil deyib ki, istintaq materiallarında çoxsaylı prosessual pozuntular var.

O, buna nümunə olaraq "Abzas Media”nın ofisində aparılan axtarışda iştirak edən bir neçə nəfərin kimliyinin protokolda göstərilməməsini qeyd edib. 

“Sonradan həmin şəxslərin kimliyinin müəyyən edilməsi ilə bağlı məhkəməyə vəsatət təqdim etsək də, təmin edilmədi. Ofisdən tapıldığı iddia olunan 40 min avronun ekspertizaya göndərilməsi barədə vəsatətimiz də rədd edildi. İstintaq materialları bu kimi çoxsaylı prosessual xətalarla doludur”, - vəkil bildirib.

F.Mehdiyev məhkəmədən cinayət işinə bəraətedici əsaslarla xitam verilməsini istəyib.

Daha sonra söz haqqı alan Ülvi Həsənli bildirib ki, o və həmkarları apardıqları korrupsiya araşdırmalarına görə cəzalandırılıblar.

“Biz İlham Əliyev və onun ətrafının korrupsiya əməllərini, Qarabağda milyonlarla vəsaitin necə mənimsənildiyini, ölkə pullarının offşor şirkətlər vasitəsilə xaricə çıxarıldığını araşdırırdıq. Axırda da gətirib bizi araşdırdığımız cinayətlərdə ittiham etdilər”, - o əlavə edib. 

Ü.Həsənlinin sözlərinə görə, saxlanıldığı gün Bakı Şəhər Baş Polis İdarəsində ondan Qarabağda korrupsiya haqda araşdırmaları barədə soruşulub:

“Bizi qaçaqmalçılıq və digər maliyyə cinayətlərində ittiham etsələr də, saxlanıldığım gün Bakı Şəhər Baş Polis İdarəsində məndən niyə Qarabağın işğaldan azad olunmasından yox, oradakı korrupsiya faktlarını araşdırdığımız soruşulmuşdu. Bu, işin mahiyyətini göstərir. Biz yüksək vəzifəli məmurların əməllərini ifşa etdiyimiz üçün cəzalandırılmışıq”, - o qeyd edib. 

Prosesin sonunda məhkəmə baxışı qeyri-müəyyən müddətə təxirə salınıb.

2025-ci ilin iyunun 20-də Bakı Ağır Cinayətlər Məhkəməsində baş tutan iclasda “Abzas Media işi” üzrə təqsirləndirilən şəxslərə hökm oxunub. 

Hakimin qərarı ilə “Abzas Media”nın direktoru Ülvi Həsənli, baş redaktor Sevinc Vaqifqızı, araşdırmaçı jurnalist Hafiz Babalı, "Azadlıq Radiosu"nun jurnalisti Fərid Mehralızadə 9 il, jurnalistlər Nərgiz Absalamova və Elnarə Qasımova 8 il, “Abzas Media”nın koordinatoru Məhəmməd Kekalov isə 7 il 6 ay azadlıqdan məhrum edilib.

Onlar qaçaqmalçılıq da daxil olmaqla bir neçə maddədə ittiham ediliblər.

Lakin jurnalistlər ittihamları rədd edib və məhz peşə fəaliyyətlərinə görə həbs olunduqlarını bildiriblər.