Azərbaycanda həbsdə olan erməni iş adamı, Qarabağdakı keçmiş separatçı qurumda "dövlət naziri" vəzifəsi daşımış Ruben Vardanyan son məhkəmə prosesində müdafiə çıxışı etməkdən imtina edib. 

Yaxınlarının yaydığı xəbərə görə, Vardanyan məhkəməni “ədalətin təqlidi” kimi xarakterizə edib və prosesin “ədalətli məhkəmənin əsas standartlarına cavab vermədiyini və buna görə də sözün əsl mənasında məhkəmə kimi qəbul edilə bilməyəcəyini" deyib. 

Azərbaycanın hökumətyönlü mətbuatı Vardanyanın çıxışında təcridxanada Məhəmməd Füzuli və Hüseyn Cavidin əsərlərini oxuduğunu qeyd etdiyini yazıb. 

Yaxınları isə iş adamına istinadən bildirir ki, o, Füzulinin yazdıqlarının Azərbaycandan çox "Ermənistana aiddiyəti olduğunu" deyib. 

Vardanyan Füzulinin bir poemasının son misrasında deyilən “bir çörək qırıntısı üçün qul olma” sözlərini sitat gətirərək əlavə edib: “Hətta vaqon-vaqon benzinə görə də yox!". Bununla o, Ermənistanın son vaxtlarda Azərbaycandan yanacaq idxalına işarə edib.

Vardanyan davam edərək bildirib ki, "tərəflərdən biri digərinin qarşısında özünü alçaltmağa məcbur edilərsə, sülh mümkün ola bilməz və iki ölkə bərabər qonşular kimi mövcud olmalıdır." 

Bundan əlavə, o, sözünü kəsmə cəhdlərinə baxmayaraq üç dəfə bu sözləri təkrar etdiyini iddia edib: “‘Artsax’ mövcud olub, ‘Artsax’ mövcuddur və ‘Artsax’ ekzistensial mənada mövcud olacaq. O vardı, var və olacaq”.

Vardanyan Azərbaycan dövlətinin “həqiqətən uzunmüddətli sülhün təməlini qoya biləcək real məhkəmə prosesi keçirmək fürsətini qaçırdığından” təəssüfləndiyini də qeyd edib.

İş adamı 2023-cü ilin sentyabrında Azərbaycanın keçmiş Dağlıq Qarabağ ərazisində apardığı hərbi əməliyyatdan sonra erməni əhalinin köçü zamanı həbs olunub.

Həmin vaxt həbs olunan, separatçı rejimin sabiq liderləri də daxil olmaqla 20-yədək şəxsin məhkəmə prosesi isə ayrılıqda aparılıb. 

Fevralın 5-də baş tutmuş həmin prosesdə məhkəmə erməni məhbuslara 15 ildən başlayaraq ömürlük məhrumetməyə qədər müxtəlif cəzalar verib. 

R.Vardanyan və digərləri Azərbaycana qarşı təcavüzkar müharibə aparma, soyqırımı, əhalini məcburi köçürmə, azadlıqdan məhrum etmə, hərbi soyğunçuluq, qəsdən adam öldürmə, qanunsuz sahibkarlıq, terrorçuluq da daxil olmaqla 20-dən çox maddə ilə ittiham olunublar. 

R.Vardanyan daha əvvəlki ictimai açıqlamalarında ittihamları rədd edib və məhkəmə prosesini "şou" adlandırıb.