Qazi Elvin Cəfərovun Sabirabad rayon İcra Hakimiyyəti qarşısında özünü yandırmasından sonra Toplum TV icra başçısı Siraqəddin Cabbarova  iki  dəfə müsahibə üçün müraciət edib, ancaq başçı hər dəfə çox məşğul olduğunu bildirərək müsahibə verməyib.

Suallara  Sabirabad rayon İcra Hakimiyyəti yanında Vətən müharibəsi iştirakçıları və şəhid ailələri ilə işin təşkili şöbəsinin müdiri Müslüm Rzayev cavab verib.

-Elvin Cəfərovdan başqa da Sabirabadda qazi intiharları olub. Sizcə niyə qazilər etiraz üçün son varianatı - intiharı seçirlər?

- Özünü asan qazini nəzərdə tutursunuz yəqin. Onun da ailəsi intiharın səbəbi ilə bağlı müraciət edib, bizim rəhbərlik onları qəbul edib, dinləyib. Kim bu barədə soruşursa, öyrənmək istəyirsə, Sabirabad rayon Prokurorluğunda hazırda bu barədə iş gedir. Paralel olaraq, ayın 10-da Qurban bayramında özünü yandıran qazimizlə də bağlı istintaq gedir, buna görə də detallar rəsmi açıqlanmır. İstintaq yekunlaşdıqdan sonra Azərbaycan xalqı hər şeyi biləcək.

- Həmin hadisədən sonra icra başçısı Siraqəddin Cabbarov qazinin yas mərasimində iştirak etdi. Sonra jurnalistlərə açıqlamasında hər şeyin, o cümlədən Cəfərovun psixi problemləri olduğunun və başqa bütün məsələlərin üzə çıxacağını dedi.

- Cənab başçının dediyi söz budur. Ona mən nə deyə bilərəm ki...

- Əgər istintaq bitməyibsə, başçı necə müəyyənləşdirə bilər ki, qazinin psixi problemləri olub?

- İnsanın özünə qəsd etməsi yəqin ki nəsə bir... Belə deyim də müharibədən sonra hər kəs travma alır. Onu şəxsən tanıyırdım, keçdiyi döyüş yolunu, müharibədə göstərdiyi şücaətləri bilirdim. Buna görə müharibədə iştirak etmiş biri kimi onun ölmünə çox pis oldum, Elvin getməli oğlan deyildi. O həqiqətən torpaq uğrunda can qoymuşdu, düşmənlərə qan uddurmuşdu. Belə bir  döyüşçünün travması yəqin başqalarından daha böyük olub.

- Siz deyirsiniz ki, müharibədə insanlar travma alır. Bəs travma alanların reabilitasiyasına yardım edilirmi, yaxud da onlara hansısa şəkildə kömək göstərilirmi?

- Bizim şöbə açılandan bəri əsas məqsədimiz şəhid ailələri, qazi və veteranların diqqət və qayğıdan kənarda qalmamısıdır. Düzdür, kimsə deyə bilməz ki, problem olmayan yer var. Hər bir yerdə problemlər var, iş gedirsə bu qaçılmazdır. Bizə müxtəlif cür müraciətlər daxil olur, işsizliklə, özünə məşğulluqla bağlı və s. Müraciətlərin əksəriyyəti müalicə ilə əlaqədardır. Biz də bununla bağlı öz töhfələrimizi, tövsiyələrimizi veririk.

- Bu töhfələr nədən ibarətdir?

- Belə deyim, müalicə almaq istəyən  qazi müraciət edəndə dərhal rayon Mərkəzi Xəstəxanası ilə əlaqə saxlayırıq.

Xəstəxanada qazinin sağlamlıq vəziyyəti ilə bağlı ilkin diaqnoz qoyulur. Məsələn, psixi problemi varsa, aiddiyyatı şöbəyə yönləndirilir, böyrəyi ilə bağlı problemi varsa, uroloji müalicə aparılır. Əgər burada müalicəsi mümkündürsə edilir, mümkün deyilsə dərhal rayondan kənara  göndəriş verib yollayırıq. 

Bəzi qazilər özəl xəstəxanada müalicə almaq istəyir. Belə olan halda cənab prezidentin sərəncamı ilə yaradılan “YAŞAT” Fonduna müraciət edirik. Elə müharibə iştirakçısı var, bu fond barədə məlumatlıdır. Məlumatlı olmayanları isə maarifləndiririk.

- İcra Hakimiyyətində müharibə iştirakçılarının siyahısı varmı?  Onların şikayət edib-etməməsindən asılı olmayaraq vəziyyətləri barədə necə məlumat alırsınız? Yaxud da necə müəyyən edirsiniz ki, hansısa qazinin və ya şəhid ailəsinin problemi var?

- Bizim rayondan Vətən müharibəsində 1164  igidimiz iştirak edib. Onun 43 nəfəri şəhid olub, 153 nəfəri yaralanıb. 42 nəfər isə müharibə əlilidir. Birdən hansısa qazinin köməyə ehtiyacı olar, deməyə utanar, çəkinər, yaxud da maddi çətinlikləri olar deyə yerli nümayəndəliklə tez-tez əlaqə saxlayıb onlar haqqında məlumatları soruşuruq. Bəzən də elə olur ki, qazilər özləri əlaqə saxlayır. İmkan daxilində nə kömək lazımdırsa edirik.

- Siz yəqin görmüş olarsınız. Elvin Cəfərovun intiharı xeyli müzakirə edildi, gündəm oldu. Hətta Sabirabad rayon İcra Hakimiyyətinin rəsmi səhifəsinə yazılan şərhlərdə başçı tənqid edilirdi.

Tənqidlərdən belə anlaşılır ki, müharibə iştirakçılarına laqeyd, soyuq münasibət var. Hətta onlar bəzən qapıdan qaytarılır. Bu tənqidlər yalandırsa, sizcə, necə oldu ki, insanlarda belə qənaət formalaşdı?

 - Hər həftənin cümə axşamı səhər saatlarından başlayaraq başçı qəbul keçirir. Qəbul axşama qədər davam edir, nə vaxt bitəcəyi isə qeyri-müəyyən olur. Qəbulda bütün vətəndaşlar iştirak edə bilər. Müharibə iştirakçıları,onların ailəsi həmişə növbədənkənar qəbul edilir. Məsələn, saat 9-dan növbədə gözləyən adam var, amma saat 12-də hansısa qazi icraya gəlirsə, birinci o içəri daxil olur.

- Bayaq dediniz ki, müharibə travması alanlar həkimlərə yönləndirilir. Elvin Cəfərov psixoloji müalicə almışdı?

- O bizim rayonda müalicə edilib. Ancaq açığını deyim ki, bu barədə tam məlumatlı deyiləm. Hansı sahə üzrə müalicə aldığını deyə bilməyəcəyəm.

- Bəs onda necə əminliklə deyə bilirsiniz ki, bütün qazilərə diqqət və qayğı göstərilir?

- Elvin Cəfərovun son aylarda İcra Hakimiyyətinə müraciəti daxil olmayıb. Biz telefonla əlaqə saxlayırdıq, bəzən də görüşürdük. Çətinliyi olması ilə bağlı məlumatlı deyildik. O həmişə bizdən razılıq edirdi. Dəfələrlə olub ki, dövlət televiziyası çəkiliş edəndə mərhum Elvin Cəfərov da müsahibə verib.

- Siz özünüz də müharibə iştirakçısınız, etiraf edirsiniz ki, hər yerdə problemlər var. Şöbənin müdiri olaraq problemi nədə görürsünüz?

- Tək Sabirabadda deyil, respublika səviyyəli problem müharibə iştirakçılarının işsizliyidir. Ümid edirəm ki, yaxın zamanlarda bu məsələ dərindən öz həllini tapacaq.