Toplum TV-nin təsisçisi olan Ələsgər Məmmədlinin həyat yoldaşı saytlara, kanallara müraciət etdi 

Toplum TV-nin təsisçisi, 10 aydır qaçaqmalçılıq ittihamı ilə həbsdə olan Ələsgər Məmmədlinin həyat yoldaşı Günay Məmmədli bəzi sayt və telekanalların davranışı ilə bağlı Facebook səhifəsində paylaşım edib. 

“Deməli, on aydır ki, dayanmadan bəzi üzdəniraq saytlar və kanallar Ələsgər Məmmədlini qaçaqmalçı, cinayətkar kimi qaralamaqda davam edirlər. Əvvəla, istintaq “davam edir” və istintaq gizli getdiyi üçün qurum tərəfindən heç bir məlumat kənara sızdırılmır. Bu da o deməkdir ki, bu “saytlar və telekanallar” məsuliyyət daşıyır. Yəni siz heç bir cinayət əməli (hər kəs çox gözəl bilir ki, belə bir şey yoxdur) sübut edilmədən bu paylaşımlarınızla Cinayət Məcəlləsinin 148-ci maddəsinə əsasən məsuliyyət daşıyırsınız”, - Günay Məmmədli yazır. 

O, daha sonra həmin sayt və kanallardan niyə ölkədə baş verən haqsızlıqları işıqlandırmamalarının səbəbini soruşur: “Niyə ölkədə baş verən özbaşınalıqlar, cinayətlər, sürüklənən şəhid anaları… yəni real cinayətlər sizi narahat etmir? Azərbaycanın müstəqilliyi, inkişafı üçün öz mənafeyini düşünmədən illərini, sağlığını verən bir ziyalı haqsız yerə 10 aydır həbsə atılıb və siz də utanmadan bu yalan ssenarilərdə rol almısınız.

Hələ ki bu şəkildə xəbərdarlıq edirəm. Bunun hüquqi yanaşması da ardından gələcək…”

Bir gün həmin sayt və telekanlların da qapılarının döyüləcəyini yazan G.Məmmədli bir fərqi qeyd edir: “Ancaq siz Ələsgər Məmmədli kimi haqsızlığa uğramayacaqsınız, sizin qapılarınız haqlı olaraq döyüləcək”.

Ələsgər Məmmədli “Toplum TV işinə” görə saxlanılan 7 nəfərdən biridir, bu iş üzrə 9 nəfər haqqında cinayət işi açılıb. Onlar qaçaqmalçılıqda ittiham olunurlar. Özləri ittihamı rədd edirlər. 

Son zamanlar bir sıra hökumətyönlü saytlar Toplum TV, Abzas Media və Meydan TV və bu media qurumlarında çalışan ayrı-ayrı şəxslər haqqında təsdiqini tapmamış, uydurma, qərəzli məlumatlar yayırlar.