Azərbaycanın müxtəlif rayonlarında icra hakimiyyətlərində ixtisarların aparıldığına dair məlumatlar yayılmaqda davam edir.

Ən son martın 31-də Şəmkir Rayon İcra Hakimiyyətində 53 işçinin vəzifədən azad olunduğu xəbəri yayılıb. 

"Oxu. az"ın məlumatına görə, icra başçısı Rəşad Tağıyevin sərəncamı ilə həmin əməkdaşların dövlət qulluğuna xitam verilib və onlar ehtiyat kadr siyahısına əlavə olunublar. Vəzifələrini itirənlərdən 48 nəfərin kənd inzibati ərazi dairələrində çalışanlar olduğu deyilir.

Daha əvvəl Ağsuda 14, Tovuzda 43, Cəlilabadda 38, Qubada 36, Göyçayda 27, Lənkəranda 44, Bərdədə 43 və Ağdamda 54 nəfərin yerli icra hakimiyyətlərindəki vəzifələrindən azad edildiyi barədə məlumatlar yayılıb.

Bu hallarda ixtisarların səbəbi adətən açıqlanmır və qərarlar əsasən “struktur dəyişikliyi” ilə izah olunur.

Liberal İqtisadçılar Mərkəzinin sədri Akif Nəsirli “Toplum TV”-yə deyir ki, ixtisarlar dövlət büdcəsində xərclərin optimallaşdırılması siyasəti ilə əlaqəli ola bilər. 

“Adətən, belə addımlar dövlət aparatının daha səmərəli işləməsi, şişirdilmiş ştatların ixtisarı və inzibati xərclərin azaldılması məqsədi daşıyır. Xüsusilə, iqtisadi qeyri-müəyyənliklərin artdığı dövrlərdə hökumətlər idarəetmədə qənaət rejiminə keçməyə üstünlük verirlər”, - o qeyd edib. 

Bununla yanaşı, A.Nəsirli düşünür ki, ixtisarlar təkcə büdcə amili ilə izah olunmaya bilər:

“Bəzi hallarda struktur islahatları, idarəetmənin təkmilləşdirilməsi, funksiyaların təkrarlanmasının aradan qaldırılması və ya yeni idarəçilik modelinə keçid də bu prosesləri şərtləndirir. Bildiyiniz kimi, artıq Naxçıvanda və işğaldan azad edilmiş rayonlarda yəni idarəetmə modeli tətbiq edilir. Yəni, məqsəd sadəcə xərcləri azaltmaq deyil, eyni zamanda daha effektiv və çevik idarəetmə mexanizmi qurmaqdır. Digər tərəfdən, kadr siyasətində yenilənmə, performansa əsaslanan qiymətləndirmə və daha peşəkar kadrların cəlb edilməsi kimi faktorlar da bu məsələdə rol oynaya bilər. Bu baxımdan, bəzi vəzifələr ləğv olunsa da, müəyyən sahələrdə yeni təyinatlar və struktur dəyişiklikləri də paralel şəkildə həyata keçirilə bilər”.

III Respublika Platformasının qurucu üzvü, siyasi şərhçi Araz Əliyev isə əsas səbəbin büdcə xərcləri ilə bağlı olduğu qənaətindıdir.

“Qarabağın azad olunmasından bəri hər il hökumət Qarabağ və ətraf ərazilərdə yenidənqurmaya 4-5 milyard manat məbləğində vəsait ayırır. Bu isə Azərbaycan kimi iqtisadi potensialı böyük olmayan ölkədə büdcə üzərində ciddi yük yaradır. İran müharibəsinə qədər dünya bazarlarında neftin qiymətində azalma müşahidə olunurdu. Digər tərəfdən, neft hasilatı da aşağı düşür. Hökumət də son 5-6 ildə xərcləri optimallaşdırmaq üçün addımlar atır. Bunlara korrupsiya ilə məşğul olan məmurların həbsi, şagird sayı az olan məktəblərin bağlanması, dövlət qurumlarının birləşdirilməsi, o cümlədən ixtisarlar daxildir”, - o bildirib. 

A.Əliyevin sözlərinə görə, hazırda ləğv olunan iş yerlərinin əksəriyyəti neft bumu dövründə icra hakimiyyətlərinin “korrupsiya yuvası”na çevrilməsi nəticəsində yaradılmışdı. 

Son dövrlərdə icra hakimiyyətlərinin gələcəkdə ayrıca idarəetmə strukturu kimi saxlanılıb-saxlanılmayacağı ilə bağlı suallar artmaqdadır. Belə ki, prezident İlham Əliyev yanvarda yerli telekanallara verdiyi müsahibədə son illərdə Qarabağ və Şərqi Zəngəzurda tətbiq olunan xüsusi nümayəndəlik modelinin digər rayonlarda da tətbiq edilə biləcəyini istisna etməyib. O, yeni modeli “operativ, çevik və daha az məmurun iştirakını tələb edən üsuli-idarə metodu” adlandırıb. 

A.Əliyev düşünür ki, hakimiyyət xüsusi nümayəndəlik modelini daha yaxşı alternativ kimi təqdim etməklə icra hakimiyyətlərinin yararsızlığını ifşa etmiş olub. 

“Hökumətin gəlirləri azaldıqca öz yaratdığı sistem özünə mane olmağa başlayır. Vaxtilə hakimiyyətin avtoritarlığını qorumaqda əməyi olan icra başçıları bu gün qapı kənarına qoyulur”, - o qeyd edib.