Avropa Şurası Parlament Assambleyasının (AŞPA) Hüquq Məsələləri və İnsan Hüquqları Komitəsi mayın 27-də Tallində keçirilən iclasında Azərbaycanda “tənqidi səslərin sistemli şəkildə susdurulması” ilə bağlı narahatlığını ifadə edib.

Komitə bildirilib ki, xüsusilə “Media haqqında”, “Siyasi partiyalar haqqında” və “Qeyri-hökumət təşkilatları haqqında” qanunlar kimi məhdudlaşdırıcı qanunvericilik tədbirləri müstəqil jurnalistikanın, real siyasi müxalifətin, vətəndaş cəmiyyətinin və ifadə azadlığının sıxışdırılmasına gətirib çıxarıb.

Parlamentarilər insan hüquqları müdafiəçisi, seçki müşahidəçisi Anar Məmmədlinin həbsini və ona qarşı cinayət təqibini qınayıblar. Eyni zamanda, əvvəllər Azərbaycanda fəaliyyət göstərən müstəqil media qurumlarının jurnalistləri və əməkdaşları, blogerlər, demokratiya tərəfdarları, müxalifət nümayəndələri və insan hüquqları müdafiəçilərinə qarşı repressiyaların davam etdiyi vurğulanıb.

Komitə siyasi məhbus kimi tanınan şəxslərin sayının 328 nəfərə yüksəlməsindən, eləcə də Azərbaycanla bağlı İnsan Hüquqları üzrə Avropa Məhkəməsinin çoxsaylı qərarlarının hələ də icra edilməməsindən narahatlığını ifadə edib.

Qurum Azərbaycanı Avropa Şurasının Nizamnaməsi, İnsan Hüquqları üzrə Avropa Konvensiyası və digər beynəlxalq insan hüquqları müqavilələri çərçivəsində üzərinə götürdüyü öhdəliklərə əməl etməyə çağırıb.

Sənəddə Azərbaycan hakimiyyətinə jurnalist fəaliyyəti, korrupsiya araşdırmaları, demokratiya tərəfdarı mövqeləri və insan hüquqlarının müdafiəsi ilə əlaqədar təzyiq və cinayət təqiblərinə son qoymaq, habelə saxlanılan şəxsləri dərhal azad etmək çağırışı yer alıb. Bundan başqa, AŞPA-nın 1900 (2012) saylı qətnaməsində müəyyən edilmiş meyarlara uyğun olaraq siyasi məhbus hesab edilən şəxslərin azadlığa buraxılması tələb olunub.

Komitə həmçinin Azərbaycanın İnsan Hüquqları üzrə Avropa Məhkəməsinin qərarlarının icrasına nəzarət prosesində yenidən fəal iştirak etməsinin və icra edilməmiş bütün qərarları yerinə yetirməsinin vacibliyini vurğulayıb.

Sənəddə qeyd olunur ki, Azərbaycan hakimiyyəti parlament nümayəndə heyətini AŞPA-ya göndərməmək qərarından Avropa Şurası qarşısındakı öhdəliklərini yerinə yetirməmək üçün əsas kimi istifadə etməməlidir.

Komitə, eyni zamanda, Avropa Şurasının Baş katibinə İnsan Hüquqları üzrə Avropa Konvensiyasının 52-ci maddəsində nəzərdə tutulmuş səlahiyyətlərdən istifadə etməyi və Azərbaycan hakimiyyətindən ölkə qanunvericiliyinin Konvensiyanın effektiv icrasını necə təmin etdiyinə dair izahat tələb etməyi tövsiyə edib.

Hesabatın iyunun 22-26-da keçiriləcək AŞPA-nın plenar sessiyasında müzakirəyə çıxarılması nəzərdə tutulur.