Həbsdə olan sülh fəalı və akademik tədqiqatçı Bəhruz Səmədov saxlanma şəraitindən narazı olduğunu bildirir və informasiyaya çıxışının məhdudlaşdırıldığını qeyd edir.

Bu barədə sülh fəalının özü ictimai fəal Əmrah Təhməzovun vasitəsilə ictimailəşdirdiyi müraciətdə məlumat verib. 

"Məni bir otaqda saxlayırlar. Gün ərzində cəmi 2 saatlıq, çox kiçik, 1 metrlik balkona çıxmağa icazə verirlər. Otağımdan da televizoru və radionu götürüblər, heç nə yoxdur. Saxlanılma şəraitim çox bərbaddır. Həkimlərin mənə yazdığı bir neçə dərmanı da vermirlər", - o qeyd edib. 

B.Səmədov hələ də özünə məxsus bank hesabından pul götürməsi üçün nənəsinə etibarnamə verməyə imkan verilmədiyini əlavə edib. 

"Bəhanə edirlər ki, mənim şəxsiyyət vəsiqəm itib. Mən gərək müraciət edəm, Asan Xidmət işçiləri gələ, mən cərimə, rüsum filan ödəyəm, mənə təzə vəsiqə versinlər, sonra yenidən etibarnamə üçün rüsum ödəyib, müraciət edəm. Mən nəyə görə bu pulları xərcləməliyəm? Mənim bu rüsumlara pulum yoxdur. Mənim vəsiqəm sizdədir. Verin vəsiqəmi. Mənim anamdan qalan 3-5 manat puldan əllərinizi və gözünüzü çəkin. İmkan verin, qoca nənəm o puldan istifadə edə bilsin. İmkan verin, qoca nənəm mənim yanıma azuqə gətirmək üçün o hesabdan pul çıxara bilsin", - o vurğulayıb. 

Bəhruz Səmədovun iddiaları ilə bağlı aidiyyəti qurumlar hələlik açıqlama verməyib.

Çexiyanın Karlov Universitetinin doktorantı olan Bəhruz Səmədov Dövlət Təhlükəsizliyi Xidmətinin əməkdaşları tərəfindən 2024-cü il avqustun 21-də həbs olunub.

O, 2025-ci il iyunun 23-də Bakı Ağır Cinayətlər Məhkəməsinin hökmü ilə 15 il müddətinə azadlıqdan məhrum edilib. Sülh fəalı dövlətə xəyanətdə ittiham olunur.

Cinayət işində iddia edilir ki, o, Ermənistan xüsusi xidmət orqanları ilə əməkdaşlıq edib.

Bəhruz Səmədov məhkəmələrin birində bildirib ki, heç vaxt Dağlıq Qarabağın Ermənistan ərazisi olduğunu deməyib və daim sülhü müdafiə edib. O, dövlətlər arasında müharibəyə və bunun nəticəsində insanların həlak olmasına qarşı olduğunu vurğulayıb.