Belçika bu ay Nyu-Yorkda baş tutacaq Birləşmiş Millətlər Təşkilatının (BMT) Baş Assambleyasında Fələstin dövlətini tanıyacaq. 

Bunu Belçikanın xarici işlər naziri Maksime Prevot “X” səhifəsində bildirib. 

Onun sözlərinə görə, tanınmadan əlavə olaraq İsrail hökumətinə qarşı “ciddi sanksiyalar” tətbiq ediləcək. Həmçinin, Qəzza zolağına nəzarət edən HƏMAS qruplaşması “tərəfdarlarının antisemitizmi və ya terrorizmin qəhrəmanlaşdırılması daha sərt şəkildə qınanacaq”. 

Prevot qərarı Qəzzada baş verəcək “hər hansı soyqırımı riskinin qarşısını almaq öhdəliyi də daxil olmaqla beynəlxalq öhdəliklərlə” izah edib. 

“Belçika İsrail hökumətinə və HƏMAS terrorçularına təzyiqi artırmaq üçün qətiyyətli qərarlar qəbul etməli idi. Burada məqsəd İsrail xalqını sanksiyalara məruz qoymaq deyil, lakin hökumətinin beynəlxalq və humanitar hüquqa hörmət etməsini təmin etmək və yerdəki vəziyyətin dəyişməsi ümidilə hərəkətə keçməkdir”, - o yazıb. 

Nazir əlavə edib ki, Belçika İsrailə 12 sahədə sanksiya tətbiq edəcək. Bunlara nümunə olaraq, o, İsrailin Fələstində işğal etdiyi ərazilərdən məhsulların idxalına qadağa, İsrail şirkətləri ilə dövlət satınalmaları siyasətinə yenidən baxılması, “Qərb Sahili”ndə İsrailə məxsus qanunsuz məskənlərdə yaşayan belçikalılara konsulluq yardımının məhdudlaşdırılması, uçuş və tranzit qadağaları, israilli nazirlərin “arzuolunmaz şəxs” elan edilməsi kimi addımları sadalayıb. 

Prevot əlavə edib ki, ölkəsi iki dövlətli həll yoluna aparan və hər iki dövlətin tanınmasını nəzərdə tutan Nyu-York Bəyannaməsinə də qoşulacaq.

Buna baxmayaraq, nazir onu da bildirib ki, bu tanımanın inzibati rəsmiləşdirilməsi kral fərmanı ilə yalnız HƏMAS əsirliyində olan son israilli girov azad olunduqdan və HƏMAS-ın Fələstin üzərində heç bir idarəetmə forması qalmadıqdan sonra həyata keçiriləcək.

Daha öncə Fransa, Böyük Britaniya, Kanada, Portuqaliya, Malta və Avstraliya da Fələstini tanıyacağını bildirib. 

Hazırda Fələstini dünyanın 140-dən çox dövləti tanıyır.