Martın 5-də Azərbaycan prezidenti İlham Əliyevin sədrliyi ilə Təhlükəsizlik Şurasının iclası keçirilib. 

İclasda çıxış edən Əliyev Naxçıvana dron hücumlarından danışıb, buna görə İranın məsuliyyət daşıdığını bildirib. O, hücumları "terror aktı" adlandırıb. 

"Azərbaycan dövləti bu çirkin terror aktını qətiyyətlə pisləyir, bunu törədənlər dərhal məsuliyyətə cəlb edilməlidir. Azərbaycan tərəfinə İran rəsmiləri tərəfindən izahat verilməlidir, üzr istənilməlidir və bu terror aktını törədənlər cinayət məsuliyyətinə cəlb edilməlidir", - o deyib. 

Dövlət başçısı daha sonra 2023-cü ilin əvvəlində Tehranda Azərbaycan səfirliyinə edilən hücumu xatırladıb və onun da arxasında İran dövlətinin dayandığını deyib.

Əliyev hazırda İrana qarşı davam edən birgə ABŞ-İsrail hücumları nəticəsində ölən ali lider Seyid Əli Xamenei üçün İran xalqına başsağlığı verdiyini də xatırladıb. 

"Onların törətdiyi bu terror aktı bütün başqa çirkin amillərlə yanaşı, böyük nankorluq nümunəsidir. Son hadisələr baş verən kimi biz onlara xəbər göndərdik, başsağlığı verdik. Mən onların səfirliyinə gedib başsağlığı vermək üçün öz mövqeyimi bildirdim. Halbuki məndən başqa heç bir dövlət başçısı İranın heç bir səfirliyinə getməyib. Yəni bunu qiymətləndirməmək, bunu yerə vurmaq, özlərini alçaq, nankorlar kimi aparmaq heç kimə şərəf gətirmir. Bu şərəfsizlər, bizə qarşı bu terror aktını törədənlər peşman olacaqlar", - o qeyd edib. 

Prezident sonda əlavə edib ki, Silahlı Qüvvələr bir nömrəli səfərbərlik vəziyyətinə gətirilib və istənilən əməliyyatı keçirməyə hazırdırlar. 

Martın 5-də sosial şəbəkələrdə Naxçıvan hava limanına dron hücumuna dair videogörüntülər yayılıb. 

Azərbaycan Xarici İşlər Nazirliyi bildirib ki, dronlardan biri terminala, biri isə Şəkərabad kənd məktəbinin yaxınlığına düşüb, iki nəfər xəsarət alıb. 

Hadisə ilə əlaqədar İranın Azərbaycandakı səfiri Müctəba Dərmiçilu Azərbaycan XİN-ə çağırılıb.

İran ordusunun Baş Qərargahı isə Naxçıvana hücum etdiyi iddiasını təkzib edib.