"Prokurorun Azər Qasımlı barəsində 13 il azadlıqdan məhrumetmə cəzası istəməsi həddən artıq ağır deyil, həm də hakimiyyətin dinc tənqidçiləri susdurmaq üçün cinayət qanunvericiliyindən alət kimi istifadə etdiyi repressiv sistemin göstəricisidir”. 

Norveç Helsinki Komitəsi (NHK) Siyasi Menecment İnstitutunun həbsdə olan direktoru Azər Qasımlıya prokurorun cəza tələbi ilə bağlı yaydığı açıqlamada belə deyilir.

Komitə bildirir ki, Qasımlı hökumətin siyasi və iqtisadi siyasətinin dinc tənqidçisi kimi tanınır. 

“O, Azərbaycanda müstəqil vətəndaş düşüncəsinin və siyasi müxalifətin hörmət edilən simalarından biri hesab olunur, demokratik idarəçilik, vətəndaş iştirakçılığı, ictimai siyasət sahəsində gənc fəallara və yeni siyasi liderlərə təlim və mentorluq edib. Media şərhçisi kimi hökumət siyasətini və regional geosiyasəti təhlil edib, avtoritar təcrübələri və repressiyaları tənqid edib”, - deyə NHK qeyd edib.

Komitənin baş katibi Berit Lindeman bildirib ki, dinc hökumət tənqidçisinə 13 il həbs cəzası tələb etmək açıq siyasi qisas aktıdır: “Bu, başqalarına susmaq mesajı vermək üçün bir şəxsin həyatının məqsədli şəkildə məhv edilməsidir. Azər Qasımlıya qarşı bu qədər ağır cəza tələbi təkcə bir fərdi deyil, Azərbaycanda müstəqil vətəndaş liderliyinin gələcəyini hədəfə alır. Hakimiyyət hansı hüquqi bəhanələrdən istifadə etsə də, Qasımlının hökumətin amansız repressiyasının qurbanı olduğuna şübhə yoxdur”.

Helsinki komitəsi vurğulayıb ki, Qasımlının məhkəmə prosesi ciddi prosessual pozuntularla müşayiət olunub. 

“Müdafiə tərəfinin vəsatətləri əsassız şəkildə rədd edilib, ittihamı təsdiqləyən inandırıcı sübutlar təqdim olunmayıb. İddia edilən zərərçəkən məhkəmə zamanı ziddiyyətli ifadələr verib, lakin məhkəmə bu uyğunsuzluqları araşdırmayıb. Vəkillərin sözlərinə görə, məhkəmə zərərçəkəni Qasımlı əleyhinə ifadələrə yönləndirib”, - NHK əlavə edib.

Təşkilat A.Qasımlının həbsini son üç ildə Azərbaycanda artan repressiyaların bir hissəsi kimi qiymətləndirib: “Bu dövrdə hakimiyyət insan hüquqları müdafiəçilərini, müxalifət siyasətçilərini, jurnalistləri və blogerləri siyasi motivli ittihamlarla təqib edib, həbs edib və ya ölkədən getməyə məcbur edib. Uzunmüddətli həbs cəzaları təkcə tənqidçiləri deyil, bütövlükdə cəmiyyəti susdurmaq üçün vasitəyə çevrilib. Həbs olunanlar arasında tanınmış vətəndaş cəmiyyəti liderləri Akif Qurbanov, Ruslan İzzətli, media eksperti Ələsgər Məmmədli, müxalifət liderləri Əli Kərimli və Tofiq Yaqublu, jurnalistlər Hafiz Babalı, Ülvi Həsənli, Aynur Elgünəş, Nərgiz Absalamova, insan hüquqları müdafiəçisi Rüfət Səfərov və başqaları var”.

Komitə hesab edir ki, Azərbaycanın beynəlxalq tərəfdaşları Azər Qasımlıya qarşı hüquq pozuntusunu qəti şəkildə pisləməli, “Qasımlı və saxta ittihamlarla həbs edilmiş digər fəalların azadlığa buraxılmasını tələb etməlidir”.

Azər Qasımlı 2024-cü ilin dekabrından həbsdədir. O, Cinayət Məcəlləsinin 182.3.2-ci maddəsi (hədə-qorxu ilə tələb etmə, külli miqdarda əmlak əldə etmək məqsədilə törədildikdə) ilə ittiham olunur.

Siyasətçi ittihamı rədd edir və həbsinin ictimai-siyasi fəaliyyəti ilə əlaqəli olduğunu bildirir.