Azərbaycanda hökumətyönlü media orqanları fevralın 19-da Vaşinqtonda Azərbaycan prezidenti İlham Əliyevin qaldığı hotelin önündə baş tutmuş etiraz aksiyasının arxasında Rusiyanın dayandığını iddia edən yazılar dərc edib. 

Həmin aksiya ABŞ-də yaşayan azərbaycanlı fəallar tərəfindən keçirilmiş və Azərbaycanda siyasi məhbus kimi tanınan şəxslərin azadlığa buraxılması tələb olunmuşdu. Aksiya zamanı çəkilmiş kadrlarda prezidentin mühafizəçilərinin iştirakçılara qarşı zor tətbiq etdiyi görünürdü.

Fevralın 23-də APA informasiya agentliyi aksiya iştirakçılarının adlarını dərc edib və onların bəzilərinin Rusiya vətəndaşı olduqlarını və bu ölkənin xüsusi xidmət orqanları tərəfindən əməkdaşlığa cəlb olunduqlarını iddia edib. 

Məqalədə 2024-cü ilin dekabrında AZAL təyyarəsinin qəzaya uğraması və Rusiya Dumasının bəzi üzvlərinin Azərbaycana qarşı verdiyi bəyanatlara da istinad olunub, bu hadisələr və etiraz aksiyası arasında əlaqələr olduğu iddia olunub. 

"Nəticə etibarilə, AZAL insidenti ilə başlayan proseslər informasiya, siyasi ritorika, kiber müdaxilə və xarici platformalarda təşkil olunan aksiyalarla müşayiət olunan çoxsəviyyəli təzyiq modelinə çevrilib. Hadisələrin bu konfiqurasiyası regionda davam edən strateji rəqabətin yeni fazaya keçdiyini göstərir və mövcud dinamikanın yalnız siyasi deyil, həm də təhlükəsizlik prizmasından sistemli təhlilini zəruri edir. Bu kontekstdə Rusiyanın Azərbaycana qarşı apardığı siyasət, atdığı addımlar Moskvanın bəd niyyətlərindən xəbər verir", - yazıda qeyd olunub. 

Digər hökumətyönlü saytlar və televiziyalar da yazıda yer alan iddiaları tirajlayıb. 

"Toplum TV"-yə danışan aksiya iştirakçılarından Rəhim Yaqublu iddiaları rədd edib və "absurd və gülünc" adlandırıb. 

Sözügedən məqalədə R.Yaqublunun Azərbaycanda yaşadığı müddətdə 8 dəfə Rusiyaya gedib-qayıtdığı yazılıb. 

R.Yaqublu açıqlamasında Rusiyadakı "diktatura rejiminə" də qarşı olduğunu və bu ölkənin Ukraynada apardığı müharibədə Ukraynanı dəstəklədiyini bildirib. 

"Azərbaycan xalqının 80-90%-i Rusiyaya gedib-gəlir, 100%-inin də Rusiyadakı qohum-əqrəbaları ilə əlaqəsi var. Onda belə çıxır ki, xalqımızın mütləq əksəriyyəti Rusiya agentidir?", - o sual edib. 

Yazıda digər aksiya iştirakçılarından Adil Əmrahlının Rusiya vətəndaşı olduğu və uzun müddət bu ölkədə yaşadığı qeyd olunub. 

A.Əmrahlı "Toplum TV"-yə açıqlamasında 2011-ci ildə Rusiyaya getdiyini və 2014-cü ildə bu ölkənin vətəndaşlığını aldığını təsdiqləyib. 

"Həyatımın böyük bir hissəsi Rusiyada keçib. Azərbaycanda qazanc tapa bilmədiyim üçün müxtəlif işlərdə çalışmışam - taksi sürmüşəm, ticarətlə məşğul olmuşam, kafedə və mağazada işləmişəm. Heç vaxt heç bir dövlət qurumu, hakimiyyət və ya siyasi strukturla bağlılığım olmayıb", - o deyib. 

O da Rusiya hakimiyyətinin əleyhinə olduğunu və Ukraynanı dəstəklədiyini bildirib. 

"Mənim və ailəmin heç vaxt hansısa agentura, xüsusi xidmət orqanı və ya polis strukturları ilə əlaqəsi olmayıb. Atam həm Rusiya, həm də Azərbaycan vətəndaşıdır, adi fəhlədir, Rusiyada çalışır və ildə bir dəfə Şəkiyə gəlib istirahət edir. Pasportumdakı möhürlər, müxtəlif ölkələrə səfərlərim və bu gün Amerikada yaşamağım mənim Azərbaycanı sevmədiyim anlamına gəlmir. Əksinə, azad yaşamaq və fikirlərimi sərbəst ifadə edə bilmək üçün bu yolu seçmişəm. Azərbaycanda bu düşüncələrlə açıq şəkildə mövqe bildirməyin çətin olduğunu düşündüyüm üçün bu gün Amerikadayam", - o əlavə edib. 

Yazıda adı çəkilən digər aksiya iştirakçısı Bəxtiyar Abbasov isə ittihama ironiya ilə cavab verib. 

"Əlbəttə ki, mən Rusiya agentiyəm, çünki mən xalqın 300 milyard dollar neft pulunu oğurlamışam, Tərtər qətliamını törətmək əmrini mən vermişəm, quru sərhədləri mən bağlamışam, qazilərin intihar etməsinin də, xalqın rəzil gündə olmasının da səbəbkarı mənəm", - o deyib. 

"Azərbaycanda hakimiyyəti zəbt edən, xalqın səsi ilə seçilməyən, Rusiyanın "cocuq"ları haqq sözünü deyənlərə rus agenti deyir. Bu, faciədir", - B.Abbasov əlavə edib. 

Fevralın 19-da Qəzza Sülh Şurasının ilk toplantısında iştirak üçün Vaşinqtonda olan İlham Əliyevin qaldığı hotelin önündə etiraz aksiyası keçirilib. Əliyevin mühafizəçiləri aksiyaçılara qarşı zorakılıq göstərib. Onların bir neçəsi yüngül xəsarət aldıqlarını və paltarlarının cırıldığını bildirib. 

Vaşinqton prokurorluğu insidentin araşdırıldığını deyib. Azərbaycanın ABŞ-dəki səfirliyi isə hadisəni "təxribat" adlandırıb.