Rusiya xarici işlər naziri Sergey Lavrov fevralın 5-də Ermənistan parlamentinin spikeri Alen Simonyanı qəbul edib. 

Lavrov nitqində Ermənistanın Rusiya üçün müttəfiq və strateji tərəfdaş olduğunu deyib. 

"Biz bilirik ki, Ermənistan rəhbərliyi Rusiya Federasiyası ilə mövcud əlaqə və əməkdaşlıq səviyyəsinin qorunub saxlanmasında maraqlı olduğunu ifadə edib. Eyni zamanda bilirik ki, həmin regiondan kənarda yerləşən bütün ölkələr bununla razı deyil. Avropa İttifaqından olan həmkarlarımız buna qarşı çıxmaq üçün kifayət qədər fəal işləyirlər. Biz tərəfdaşlarımızın istənilən sahədə xarici əlaqələrini inkişaf etdirməsinə heç vaxt etiraz etməmişik. Aİ-dən olan həmkarlarımıza gəlincə isə, onlar sözügedən ölkəni daim bir seçim qarşısında qoymaqdan əl çəkmirlər: ya bizimləsən, ya da onlarla. Bu, onların postsovet məkanında artıq 20 ildən çoxdur ki, sadiq qaldıqları məntiqdir. Ümid edirəm ki, Ermənistan bunun arxasında nələrin dayandığını aydın şəkildə anlayır", - o bildirib. 

Lavrov Aİ ölkələri tərəfindən Rusiya-Ermənistan əlaqələri haqda "düşmənçiliyin təşviqinə hesablanmış" dezinformasiyaların yayıldığını iddia edib. 

"Bəzən kiminsə guya Ermənistana qarşı “şimaldan” hansısa xəyali hücumların hazırlandığını və ya Kollektiv Təhlükəsizlik Müqaviləsi Təşkilatının guya mövcudluq səviyyəsində bir təhdid yaratdığını iddia etdiyini eşitmək bizim üçün müəyyən qədər təəccüblüdür", - o əlavə edib. 

Nazir daha sonra bu il Ermənistanda keçiriləcək parlament seçkilərinə toxunub. 

"Sizi əmin edə bilərəm ki, xaricdən kiminsə açıq şəkildə Rusiya Federasiyasına işarə edilərək - seçkilərə müdaxilə etmək niyyətində olduğu ilə bağlı mesajlar eşidəndə və ya Yerevanın bu cür müdaxilənin qarşısını almaq üçün Avropa İttifaqına müraciət etdiyini görəndə biz bunu təəccüblü hesab edirik. Heç bir şübhəm yoxdur ki, Yerevanda məsuliyyətli siyasətçilər bu cür addımların şübhəsiz şəkildə təxribatçı məqsədlərlə atıldığını tam dərk edirlər. Biz dəfələrlə bəyan etmişik ki, Ermənistan öz suveren seçimini həyata keçirir", - o qeyd edib.

Simonyan öz növbəsində Rusiyada ictimai şəkildə səsləndirilən müəyyən bəyanatlardan Ermənistanın narahatlıq keçirdiyini deyib. 

“Bu, təkcə bizi deyil, Ermənistan cəmiyyətini də narahat edir. Siyasətçilər digər siyasətçilərlə əvəz oluna bilər, lakin Moskva tərəfindən səslənən bəzi bəyanatlar Ermənistan cəmiyyəti tərəfindən çox mənfi qarşılanır. Bu cür reaksiya ona görə yaranır ki, Moskva önəmlidir. Moskvanın müttəfiq olub və müttəfiq olaraq qaldığına dair bir anlayış mövcuddur. Məhz buna görə də bu cür bəyanatları eşitmək çox ağrılıdır", - o bildirib.

Simonyan konkret hansı bəyanata istinad etdiyinə aydınlıq gətirməyib. Bu yaxınlarda Vladimir Solovyov kimi rusiyalı hökumətyönlü fiqurlar Ermənistana qarşı hərbi əməliyyatların keçirilməsi ehtimalından danışıblar. Rusiya Xarici İşlər Nazirliyinin sözçüsü Mariya Zaxarova isə deyib ki, Ermənistan Aİ ilə yaxınlaşarsa, ölkəni yoxsulluğa sürükləyə bilər. 

“Ermənistanın dost və müttəfiq dövlət olan Rusiyaya qarşı nəsə etməyə çalışdığı təəssüratının formalaşmasını istəmirəm", - Simonyan bildirib. 

O vurğulayıb ki, Yerevan Moskva ilə əlaqələrin, o cümlədən Avrasiya İqtisadi İttifaqı (Aİİ) çərçivəsində əməkdaşlığın qorunub saxlanılmasında maraqlıdır.

“Aİİ və gömrük ittifaqına gəldikdə isə, biz hesab etmirik ki, ondan çıxmalıyıq. Düşünürük ki, hər iki tərəf üçün faydalı olacaq bir həlli birlikdə tapa bilərik", - o əlavə edib.