Ermənistan baş naziri Nikol Paşinyan Azərbaycanın əsas hissəsini Naxçıvanla birləşdirəcək yoldakı yoxlama prosesindən danışıb. 

Parlamentdə çıxış edən baş nazirdən müxalif deputat Aqnesa Xamoyan azərbaycanlıların sözügedən yoldan keçidi zamanı pasport və yüklərinin yoxlanışının necə olacağını soruşub. 

"Azərbaycanlılar Sünikdən keçəndə Ermənistan sərhədçiləri onların pasportlarını yoxlayacaqmı? Ermənistan gömrükçüsü onların yükünə baxacaqmı və əgər azərbaycanlılar həmin yolda hər hansı cinayət törətsələr, Ermənistan polisi müdaxilə edə bilərmi və Ermənistan hakimi onları mühakimə edə bilərmi?”, - deyə Xamoyan sual edib. 

Paşinyan sualların hamısına konkret cavab verməyib, lakin o, cavabında son texnologiyalardan danışıb. 

Baş nazir Birləşmiş Ərəb Əmirlikləri (BƏƏ) nümunəsini göstərərək həmin ölkədə sərhədçilərin deyil, sensorlu avadanlığın insanların pasportlarını yoxladığını deyib. O bildirib ki, Ermənistan da bu texnologiyanı tətbiq etməlidir.

“İnsana toxunmaq, iyləmək, qulağını çəkmək, saçını dartmaqla onun həqiqi olub-olmadığını yoxlamaq üsulu bizim sərhədlərdə, heç kəsə qarşı tətbiq olunmamalıdır və olunmayacaq", - Paşinyan bəyan edib.

Xamoyan isə Paşinyanın cavabından belə nəticə çıxarıb: “Bu, heç koridor da deyil, bu, azərbaycanlılar üçün nəhəng bir meydança olacaq.”

Avqustun 8-də Vaşinqtonda ABŞ, Azərbaycan və Ermənistan liderlərinin verdiyi birgə bəyannamədə qeyd olunan məsələlərdən biri də Azərbaycanı Naxçıvana birləşdirəcək, “Tramp marşrutu” adlanan yoldur. 

Bəyannamənin 4-cü maddəsində deyilir ki, Ermənistan öz ərazisində “Beynəlxalq Sülh və Rifah naminə Tramp Marşrutu” (TRIPP) bağlantı layihəsi üçün çərçivənin müəyyən edilməsi məqsədilə ABŞ və qarşılıqlı müəyyən edilmiş üçüncü tərəflər ilə əməkdaşlıq edəcək. “Biz bu məqsədə ən qısa zamanda nail olmaq üçün xoş niyyətlə səy göstərməyə dair qətiyyətimizi təsdiq edirik”, - deyə qeyd olunub. 

ABŞ prezidenti Donald Tramp isə birgə mətbuat konfrasında deyib ki, Ermənistan marşrutun 99 illiyə ABŞ-yə icarəyə verilməsinə razı olub.