"Sərhədsiz Reportyorlar" beynəlxalq mətbuat azadlığı təşkilatı (RSF) "Abzas Media işi" üzrə Ali Məhkəmənin verdiyi qərarı pisləyən bəyanat yayıb. 

Ali Məhkəmə aprelin 3-də iş üzrə həbs edilən jurnalistlərin kassasiya şikayətlərini əsassız hesab edərək rədd edib. Bununla da, onların barələrindəki uzunmüddətli həbs cəzaları qüvvədə qalıb. 

RSF məhkəmə prosesini "özbaşına və ədalətsiz" adlandırıb.

"Ləyaqətsiz saxlanma şəraiti, özbaşına həbslər və açıq-aşkar ədalətsiz məhkəmə prosesi – Azərbaycan rejimi “Abzas Media” jurnalistlərini sadəcə öz işlərini gördüklərinə görə cəzalandırır. Beynəlxalq ictimaiyyət həbsdə zorakılığa görə cəzasızlıq və ədalətin sistemli şəkildə inkarını qəbul etməməlidir”, - RSF-nin Şərqi Avropa üzrə nümayəndəsi Alena Struj deyib.

RSF insan hüquqları təşkilatlarına və mühacirətdəki media orqanlarına istinad edərək deyir ki, proses ərzində "müstəqil şəkildə ittihamların araşdırılması üçün sübutlara çıxış olmayıb, həmçinin təzyiq altında şübhəli şahid ifadələri əldə edilib və sonradan geri götürülüb". 

"Jurnalistlərin redaksiyada tapıldığı iddia olunan 40 min avronu daşıdıqlarına, gizlətdiklərinə və ya ümumiyyətlə bundan xəbərdar olduqlarına dair heç bir əlamət yoxdur. İttiham tərəfinin işi, əsasən, fərziyyələrə və əlaqələrə əsaslanan ittihamlara söykənir. Konkret sübutların yerinə peşəkar və sosial əlaqələrə istinad olunur. Müşahidəçilər, həmçinin, proses zamanı hakimlərin və prokurorların alçaldıcı davranışlar sərgilədiyini bildirirlər", - bəyanatda deyilir. 

2025-ci ilin iyunun 20-də Bakı Ağır Cinayətlər Məhkəməsində baş tutan iclasda “Abzas Media işi” üzrə təqsirləndirilən şəxslərə hökm oxunub. 

Hakimin qərarı ilə “Abzas Media”nın direktoru Ülvi Həsənli, baş redaktor Sevinc Vaqifqızı, araşdırmaçı jurnalist Hafiz Babalı, "Azadlıq Radiosu"nun jurnalisti Fərid Mehralızadə 9 il, jurnalistlər Nərgiz Absalamova və Elnarə Qasımova 8 il, “Abzas Media”nın koordinatoru Məhəmməd Kekalov isə 7 il 6 ay azadlıqdan məhrum edilib.

Onlar qaçaqmalçılıq da daxil olmaqla bir neçə maddədə ittiham ediliblər.

Lakin jurnalistlər ittihamları rədd edib və məhz peşə fəaliyyətlərinə görə həbs olunduqlarını bildiriblər.