Siyasi psixoloq Samirə Qasımlının böhtan və təhqirdə ittiham olunduğu məhkəmə işində ekspertiza təyin edilib. Ekspertiza onun “Facebook” paylaşımlarındakı ifadələrin təhqir və ya şərəf və ləyaqəti alçaldan məzmun daşıyıb-daşımadığını müəyyənləşdirməlidir.

“Azadlıq Radiosu” xəbər verir ki, Binəqədi Rayon Məhkəməsinin hakimi Samir Nəsibov sentyabrın 25-də bu barədə qərar verib. İşə baxılması ekspertizanın nəticəsi açıqlananadək təxirə salınıb.

Qasımlıdan şikayət edən Qurbanəli Yusibov onun həyat yoldaşı, həbsdə olan politoloq Azər Qasımlının cinayət işində zərərçəkmiş kimi tanınıb. Yusibov iddia edir ki, Samirə Qasımlı məhkəmə prosesi dövründə sosial şəbəkədə onun barəsində “üzəduran” və başqa ifadələr işlədərək böhtan atıb, şərəf və ləyaqətini alçaldıb. O, Qasımlının cinayət məsuliyyətinə cəlb olunmasını istəyir.

Müdafiə tərəfi isə bu iddialarla razılaşmır. Vəkil Ramil Süleymanov məhkəməyə dilçi alimin hazırladığı mütəxəssis rəyini təqdim edib. Həmin rəydə “üzəduran” sözünün işlədilməsinin şəxsin şərəf və ləyaqətinin alçaldılması kimi qiymətləndirilə bilməyəcəyi bildirilir.

Rəyə əsasən, “üzə durmaq” və “üzünə durmaq” ifadələri istintaq və məhkəmə kontekstində bir şəxsin digəri barədə və ya onun əleyhinə ifadə verməsi mənasında işlənə bilər. Vəkil məhkəmənin təyin edəcəyi ekspertizanın da mübahisəli ifadələrin məzmununa aydınlıq gətirə biləcəyini deyib.

Yusibov əvvəlki iclaslarda olduğu kimi, sentyabrın 25-də də məhkəməyə gəlməyib. Samirə Qasımlı onun iştirakı olmadan prosesin keçirilməsinə etiraz etsə də, hakim şikayətçinin vəkilinin iştirakını yetərli sayıb.

Q.Yusifov S.Qasımlını Cinayət Məcəlləsinin 147.1-ci (böhtan) və 148-ci (təhqir) maddələri üzrə ittiham edir.

S.Qasımlı həbsdə olan müxalif siyasətçi Azər Qasımlının həyat yoldaşıdır. A.Qasımlı 2024-cü ilin dekabrında məhz Q.Yusifovun şikayəti əsasında həbs olunub. 
Siyasətçi bu ilin martında Bakı Ağır Cinayətlər Məhkəməsi tərəfindən 12 il həbs cəzası alıb. O, hədə-qorxuda təqsirli bilinib. Özü isə ittihamı qəbul etmir, hakimiyyətin sifarişi ilə həbs olunduğunu deyir. 

S.Qasımlı da ittihamları qəbul etmir, həyat yoldaşının hüquqlarını müdafiə etdiyinə görə hakimiyyətin onu cəzalandırmaq istədiyini deyir. Daxili İşlər Nazirliyi tərəfindən S.Qasımlının ölkədən çıxışına qadağa qoyulub.