İranın İslam İnqilabı Keşikçiləri Korpusu (SEPAH) ölkədə ABŞ-İsrail birgə hücumları fonunda baş qaldıra biləcək etirazlarla bağlı xəbərdarlıq edib. 

Qurum martın 12-də verdiyi bəyanatda etirazların ötən dəfəkindən “daha sərt şəkildə yatırılacağını” bildirib. 

Ötən ilin sonunda Tehranda mağaza satıcılarının yerli valyutanın dəyər itirməsinə etirazı ilə başlamış nümayişlər tezliklə ölkəboyu yayılmış və bir neçə həftə davam etmişdi. 

Qərb mətbuatı etirazlar zamanı 30 mindən çox insanın öldürüldüyünü yazsa da, İran hökuməti yalnız 3117 nəfərin öldüyünü iddia edir. 

İran rəsmilərinin izahatına görə, yanvarın 8-ə qədər etirazlar dinc şəraitdə davam edib, lakin həmin gündən etibarən ABŞ və İsrail tərəfindən təlimatlandırılmış xüsusi qruplar dinc etirazçılara atəş açıb və təhlükəsizlik qüvvələri bundan sonra hadisələrə müdaxilə edib. 

SEPAH bəyanatında ABŞ və İsraili “döyüş meydanında məqsədlərinə çatmadıqdan sonra İranda narazılığı təşviq etməyə çalışmaqda” ittiham edib. “Düşmənlər indi qorxu yaymaq və küçə etirazlarını təşviq etməyə cəhd edirlər”, - bəyanatda bildirilib. 

Bu xəbərdarlıq İsrailin baş naziri Benyamin Netanyahunun açıqlamasına cavab olaraq verilib. O həmin gün mətbuat konfransında deyib ki, İsrailin hərbi kampaniyası həm də iranlıların hakimiyyət əleyhinə etiraz etməsi üçün şərait yaratmaq məqsədi daşıyır.

“Biz bunun üçün optimal şərait yaradacağıq, iranlılara küçələrə çıxmaq üçün lazım olan imkanları verməyə çalışacağıq”, - o deyib. 

Fevralın 28-dən etibarən ABŞ və İsrail İrana havadan zərbələr endirir. İran da qarşılığında İsrailə və ABŞ hərbi bazalarının yerləşdiyi Fars körfəzi ölkələrinə raket və dron zərbələri endirir. 

Hücumların ilk günündə İranın ali lideri Seyid Əli Xamenei və digər yüksək rütbəli rəsmilər öldürülüb. 

Martın 12-də İranda yeni seçilmiş ali lider Müctəba Xameneinin müraciəti dövlət televiziyasında oxunub. 

O, İranın geri çəkilməyəcəyini deyib və ABŞ bazalarına ev sahibliyi edən ölkələri həmin bazaları bağlamağa çağırıb.