Bakı Ağır Cinayətlər Məhkəməsində sabiq deputat Nazim Bəydəmirli səkkiz il müddətinə azadlıqdan məhrum edilib.

Dövlət ittihamçısı onun doqquz il müddətə azadlıqdan məhrum edilməsini istəmişdi.

Nazim Bəydəmirli məhkəmədə son sözlə çıxış edib. O, iqtidara və ya müxalifətə bağlılığı olmadığınıl, müstəqil iqtisadçı olduğunu söyləyib. Keçmiş deputat sadəcə Söyüdlü hadisələrinə biganə qala bilmədiyini vurğulayıb: 

“Söyüdlü hadisələrinə görə yayılan videolar heç də xoş deyildi. Qocalara, yaşlılara qaz sıxmaq, dubinka vurmaq yaxşı deyil. Polis Azərbaycanın dövlət orqanıdır, heç vaxt təhrikedici çıxışlar etməmişəm. Heç DİN-in xəbəri olmadan AzTV-də təşkilatçı kimi təqdim olunmuşam. Bu aylar ərzində nəyin və kimin günahını çəkirəm? Bütün bunlara rəğmən bu həbsi siyasi sifariş olaraq qəbul etməmişəm. Siyasi məhbus ifadəsini yerli və beynəlxalq qurumlar qəbul edir. Bu siyahı ölkəmizə təzyiq kimi istifadə olunur. Adımın da orada olması mənə xoş deyil. Amma mənə dəstək olan hər kəsə minnətdaram”. 

N.Bəydəmirli məhkəmədən ona bəraət verilməsini istədiyini, bunun qarşılığında təzminat tələb etməyəcəyini bildirib. 

“Yazdığım yazı kiminsə xoşuna getməyibsə bu o demək deyil ki, dövlətə qarşı getmişəm. Mən onların hamısını bağışlayıram. Azərbaycanda bir nəfər belə deyə bilməz, inana bilməz ki, Nazim Bəydəmirli bu cinayəti edib. 15 ay ailəmdən kənarda saxlanmağım mənəvi əzab, işgəncədir. Zərrə qədər yazılmamış qanunları belə pozmuş olsaydım, heç kimin üzünə başımı qaldıra bilməzdim”.

Keçmiş deputat ötən il Söyüdlü hadisələrindən az sonra həbs edilmişdi.  Həmin vaxt ona qarşı Cinayət Məcəlləsinin 182.2.4-cü (hədə-qorxu ilə tələb etmə, xeyli miqdarda əmlak əldə etmək məqsədi ilə törədildikdə) maddəsi ilə ittiham irəli sürülmüşdü. Az sonra sentyabrın 1-də isə Nazim Bəydəmirlinin 27 il əvvəl, 1996-cı ildə Rusiya Federasiyasının Lipetsk şəhərində kimdənsə hədə-qorxu ilə pul tələb etməsi iddiası ilə Cinayət Məclləsinin 182.2.2 (hədə-qorxu ilə təkrar tələb etmə) maddəsilə ilə yeni ittiham irəli sürülmüşdü.

O, ittihamları qəbul etmir.

Keçmiş deputatın həbsini siyasi hesab edən hüquq müdafiəçiləri onun Gədəbəy rayonunun Söyüdlü kəndindəki qızıl mədəni ilə bağlı yerli sakinlərin etirazını müdafiə etdiyinə görə həbs edildiyi qənaətindədir. O, yerli hüquq müdafiə təşkilatları tərəfindən siyasi məhbus kimi tanınıb.