Azərbaycanda həbsdə olan erməni iş adamı, Qarabağdakı keçmiş separatçı qurumda "dövlət naziri" vəzifəsi daşımış Ruben Vardanyan bu yaxınlarda barəsində çıxarılan hökmdən apellyasiya şikayəti verməyəcəyini deyib.

Fevralın 17-də Bakı Hərbi Məhkəməsində hakim Zeynal Ağayevin sədrliyi ilə keçirilən prosesdə Vardanyana 20 il həbs cəzası verilib. 

Vardanyanın apellyasiya verməmək qərarını ailə üzvləri ictimailəşdirib. 

"Bu qərar hökm ilə razılaşmaq demək deyil və müdafiədən imtina mənası daşımır. Bu, əvvəlcədən ədalətlə heç bir əlaqəsi olmayan bir prosesi legitimləşdirməkdən şüurlu şəkildə imtina etməkdir. Dinləmələr zamanı baş verənlər məhkəmə prosesi deyil, səhnələşdirilmiş bir tamaşa idi. İclaslar qapalı şəkildə keçirilib, müstəqil müşahidəçilərin iştirakı qadağan olunub və verilən vəsatətlər nəzərə alınmayıb", - açıqlamada deyilir. 

Buna baxmayaraq, ailə üzvləri iş adamının "beynəlxalq hüquqi mexanizmlər və digər beynəlxalq instansiyalar vasitəsilə ədalət uğrunda mübarizəni" davam etdirəcəyini deyib. 

R.Vardanyan Cinayət Məcəlləsinin təcavüzkar müharibə başlatma, əhalini məcburi köçürmə, terrorçuluq, hakimiyyəti ələ keçirmə də daxil olmaqla 20-dən çox maddəsi üzrə təqsirləndirilirdi. 

O, son sözündə ittihamları bir daha rədd edib, məhkəməni "saxta" adlandırmışdı. 

İş adamı 2023-cü ilin sentyabrında Azərbaycanın keçmiş Dağlıq Qarabağ ərazisində apardığı hərbi əməliyyatdan sonra erməni əhalinin köçü zamanı həbs olunub.

Həmin vaxt həbs olunan, separatçı rejimin sabiq liderləri də daxil olmaqla 20-yədək şəxsin məhkəmə prosesi isə ayrılıqda aparılıb. 

Fevralın 5-də baş tutmuş həmin prosesdə məhkəmə erməni məhbuslara 15 ildən başlayaraq ömürlük məhrumetməyə qədər müxtəlif cəzalar verib. 

Azərbaycanda həbsdə olan ermənilərin məsələsi dünya mətbuatında vaxtaşırı gündəmə gətirilir. 

Azərbaycan prezidenti İlham Əliyev fevralın 13-də Münxendə “France 24” telekanalına müsahibəsində Azərbaycandakı erməni məhbusların "bəşəriyyətə qarşı ağır cinayətlər törətdiyini" deyib və onların azad ediləcəyini istisna edib.