Bakıda həbsdə olan erməni iş adamı Ruben Vardanyan növbəti dəfə erməni ictimaiyyətinə müraciət edib. Onun müraciətinin səs yazısı mayın 25-də özünün “X” hesabında paylaşılıb. 

Vardanyan müraciətində Ermənistan baş naziri Nikol Paşinyanı tənqid edib, onu erməni folklor qəhrəmanı Cəsur Nazara bənzədib. Cəsur Nazar erməni ədəbiyyatında qorxaq, lakin təsadüfən padşaha çevrilən bəxtəvər bir personaj kimi tanınır. 

“Nazarı padşah edən isə xalqdır, o, öz-özünə padşah olmur. Ermənilər bunu unutmasınlar”, - o qeyd edib. 

Vardanyan bildirib ki, Bakıda saxlanıldığı həbsxananın kitabxanasında erməni dilində yalnız iki kitab tapıb - onların biri yazıçı Vardges Petrosyan, digəri isə məhz Paşinyan tərəfindən yazılıb.

“Kitabınızı oxuduqdan sonra əmin oldum ki, sizin mənəvi və etik standartlar, təhsil və digər məsələlərlə bağlı ciddi problemlərinizdən əlavə, həm də yalançı, xəyalpərəsət və plagiatçısınız. Keçmiş jurnalist kimi bilməlisiniz ki, başqasının əmlakını - əqli mülkiyyəti, kitabları oğurlamaq olmaz. Amma siz bunu sakitcə və bir dəfədən çox etmisiniz”, - o əlavə edib. 

O daha sonra Ermənistan haqda danışaraq ölkəni geosiyasi təhlükənin gözlədiyi ilə bağlı xəbərdarlıq edib. 

“Ermənistan Rusiya ilə Avropa İttifaqı arasında qalarkən üçüncü qüvvədən asılı vəziyyətə düşmək riski daşıyır. Həmin üçüncü qüvvə yalnız bizim iqtisadi, maliyyə, informasiya, texnoloji cəhətdən ondan tam asılı olduğumuz, Türkiyə və Azərbaycanın bir vilayətinə çevrildiyimiz anı gözləyir. Əgər davranışımızı dəyişməsək, bizi nə Rusiya, nə də Avropa İttifaqı gözləyir. Bizi gözləyən isə Türkiyənin bir vilayətinə çevrilməkdir", - Vardanyan deyib. O, “üçüncü qüvvə” dedikdə hansı ölkəni nəzərdə tutduğunu açıqlamayıb. 

Vardanyan, həmçinin, mayın 28-də Ermənistanın Respublika Günü münasibətilə Yerevanda planlaşdırılan hərbi paradı pisləyib. O, Azərbaycanda erməni məhbusların olduğu dövrdə parad keçirilməsini "əxlaqsızlıq" adlandırıb. 

"Ordu paradlar, pul, silah və ya rütbələr üzərində qurulmayıb. Ən əsası, o, ruh üzərində qurulub - mənəvi və vətənpərvər ruh", - deyən iş adamı erməniləri paradda iştirak etməməyə çağırıb.

O, çıxışının sonunda Ermənistan hökumətini erməni məhbusların azad edilməsi üçün “heç nə etməməkdə” ittiham edib. 

Fevralın 17-də Bakı Hərbi Məhkəməsində hakim Zeynal Ağayevin sədrliyi ilə keçirilən prosesdə Vardanyana 20 il həbs cəzası verilib.  

R.Vardanyan Cinayət Məcəlləsinin təcavüzkar müharibə başlatma, əhalini məcburi köçürmə, terrorçuluq, hakimiyyəti ələ keçirmə də daxil olmaqla 20-dən çox maddəsi üzrə təqsirləndirilirdi. 

O, son sözündə ittihamları bir daha rədd edib, məhkəməni "saxta" adlandırmışdı. 

İş adamı 2023-cü ilin sentyabrında Azərbaycanın keçmiş Dağlıq Qarabağ ərazisində apardığı hərbi əməliyyatdan sonra erməni əhalinin köçü zamanı həbs olunub.
Həmin vaxt həbs olunan, separatçı rejimin sabiq liderləri də daxil olmaqla 20-yədək şəxsin məhkəmə prosesi isə ayrılıqda aparılıb. 

Fevralın 5-də baş tutmuş həmin prosesdə məhkəmə erməni məhbuslara 15 ildən başlayaraq ömürlük məhrumetməyə qədər müxtəlif cəzalar verib. 
Azərbaycanda həbsdə olan ermənilərin məsələsi dünya mətbuatında vaxtaşırı gündəmə gətirilir. 

Azərbaycan prezidenti İlham Əliyev fevralın 13-də Münxendə “France 24” telekanalına müsahibəsində Azərbaycandakı erməni məhbusların "bəşəriyyətə qarşı ağır cinayətlər törətdiyini" deyib və onların azad ediləcəyini istisna edib.