Fevralın 20-də prezident İlham Əliyevin iki fərmanı ilə 10 dövlət qurumunun müstəqil fəaliyyətinə son qoyulub. 

Bu qurumların arasında Milli Məclisin üzvü Zahid Orucun sədri olduğu Sosial Tədqiqatlar Mərkəzi də var. Qurum fərmanla Medianın İnkişafı Agentliyinə birləşdirilib. 

Fərmanda qeyd olunub ki, bu addımda məqsəd "media və sosial tədqiqatlar sahələrində idarəetmənin təkmilləşdirilməsidir". 

Sosial Tədqiqatlar Mərkəzi 2019-cu ilin fevralında yaradılmışdı. Mərkəzin nizamnaməsində yazılıb ki, mərkəz müasir informasiya texnologiyaları və elmi yanaşmalar tətbiq etməklə ictimai rəyin öyrənilməsini təmin edəcək. 

Sosial Tədqiqatlar Mərkəzi fəaliyyəti dövründə ictimai rəylə bağlı sorğu nəticələri dərc edirdi. Lakin bu sorğularda əhalinin bir qayda olaraq hökumətin fəaliyyətindən və yaşayış səviyyəsindən razı olduğu iddia olunurdu. Müstəqil müşahidəçilər isə sorğuların etibarlılığını şübhə altına alırdı. 

Məsələn, 2022-ci ilin may-avqust aylarında keçirilən rəy sorğusunun nəticələrinə görə, ölkə əhalisinin 94,7%-inin prezident İlham Əliyevə etibar etdiyi bildirilib. 

Fərmandan mərkəzin işçi heyətinin taleyinin necə olacağı, MEDİA daxilində fəaliyyətinə davam edib-etməyəcəyi aydın deyil. 

“Toplum TV” bu suallara Zahid Orucdan cavab ala bilməyib. 

III Respublika Platformasının qurucu üzvü və Xəzər Tədqiqat və Analiz Mərkəzinin direktoru Elman Fəttah deyir ki, Azərbaycanda müstəqil qurumların ictimai rəyi öyrənməsinə icazə verilməsə də, hökumət özü bu işlə məşğul olmağa davam edəcək. 

“Azərbaycanda, ümumiyyətlə, heç vaxt ictimai rəyi müstəqil şəkildə ölçmək mümkün olmayıb. Son 15 ildə də Azərbaycanda heç bir düşüncə mərkəzi, “think-tank”lər yerləşə bilməyiblər. Hamısı çıxarılıb ya da ləğv edilib”, - deyə o qeyd edib.

Elman Fəttah düşünür ki, Sosial Tədqiqatlar Mərkəzinin funksiyalarının bir hissəsini Medianın İnkişafı Agentliyi yerinə yetirəcək, bir hissəsi isə fərmanla yenidən təsis olunan Beynəlxalq Münasibətlərin Təhlili və Multikulturalizm Mərkəzinə veriləcək. 

“Düşünmürəm ki, Azərbaycan hakimiyyəti ictimai rəyin ölçülməsinə ehtiyac hiss etmir. Bu, Azərbaycan hakimiyyətinin ən həssas mövzularından biridir. Çünki ölkə performativ legitimlik strukturu əsasında fəaliyyət göstərir. Azərbaycan avtoritarizminin hüquqi baxımdan heç bir legitimliyi yoxdur, yalnız sosial müqavilə və Azərbaycan xalqının susqun razılığı əsasında öz legitimliyini formalaşdıra bilir. Bu baxımdan bu performansın hansı həddə olduğunu daim ölçmək zərurəti var. Bu sahə üzrə də həmişə fəaliyyətini davam etdirəcək”.