Aprelin 1-də Masazırın "Zəngilan şəhərciyi" kimi tanınan ərazisində yeni inşa olunmuş avtomobil yolu çöküb. 

Sosial şəbəkələrdə yayılan fotolarda yolun bir hissəsində ciddi deformasiya müşahidə olunub. 

Azərbaycan Avtomobil Yolları Dövlət Agentliyinin (AAYDA) mətbuata verdiyi açıqlamaya görə, çökməyə səbəb son günlərdə yağan güclü yağışlar və kanalizasiya kollektorunda baş vermiş qəza nəticəsində suyun yol yatağını yuması olub. 

AAYDA hələ yanvarda həmin ərazidə əsaslı yol tikintisi işlərinin getdiyini göstərən videoçarx yayımlamışdı. 

Sosial Strateji Tədqiqatlar və Analitik Araşdırmalar İctimai Birliyinin rəhbəri İlqar Hüseynli isə “Toplum TV”-yə deyir ki, Azərbaycanda yolların nasazlığında korrupsiya əsas rol oynayır. 

“Korrupsiyaya bulaşmış ölkələrdə dövlət vəsaitlərinin mənimsənməsi daha çox tikinti layihələri üzərindən baş verir. Burda da, əsasən, yol tikintisi layihələri üstünlük təşkil edir. Çünki yolun inşasında özülün keyfiyyətini ölçmək mümkün olmur, sonda asfalt örtüyü çəkilir və gözəl bir yol tikintisi görüntüsü yaradırlar,” - o qeyd edib. 

İ.Hüseynli Masazırdakı yolun çökməsi hadisəsi ilə bağlı rəsmi versiyaya inanmır. 

“Su kollektoru necə yüklənə bilər? Kollektor yüklənibsə, su asfalt örtüyünün üzəri ilə axmalı idi. Əgər asfaltın üzəri ilə axmayıbsa və əvəzində asfaltın alt qatındakı materialları yuyub aparıbsa, deməli, keyfiyyətli özül tökülməyib. Bunu rəsmilər necə yozur-yozsun, burada aydın, keyfiyyətsiz yol tikintisi faktından söhbət gedir”, - o əlavə edib. 

Ekspert xatırladır ki, əvvəllər də ölkədə keyfiyyətsiz tikintiyə görə yol çökməsi halları baş verib. 

“Təxminən 8-10 il əvvəl İmişli və Saatlı rayonları arasında kəndləri birləşdirən yol inşa olundu. Həmin yol üçün vəsait prezidentin ehtiyat fondundan ayrılmışdı. Yolun bir hissəsini İmişlidəki yol-istismar idarəsi, digər hissəsini Saatlıdakı idarə tikmişdi. Təxminən altı aydan sonra yolun Saatlıya düşən hissəsi tamamilə çökdü. Hətta prezident şəxsən yolun açılışında iştirak etmişdi. Amma İmişliyə düşən hissə 10 ildən sonra da, bəzi kiçik çökmə halları istisna olmaqla, işlək vəziyyətdədir”, - o qeyd edib.