Mayın 12-də Lökbatan qəsəbəsindəki anbarda başlayan güclü yanğın bir gün sonra söndürülüb. 

Fövqəladə Hallar Nazirliyinin (FHN) mətbuata dediyinə görə, yanğın nəticəsində ümumi sahəsi 46 min kvadrat metr (kvm) olan, müxtəlif təyinatlı malların saxlanıldığı anbarın 21 min kvm-lik sahəsi yanıb. Yanğının söndürülməsinə FHN-in 182 nəfər şəxsi heyəti, 40 xüsusi təyinatlı texnikası və 2 helikopter cəlb olunub. 

Mətbuatda yayılan xəbərlərə görə, anbardan “KontaktHome”, “Birmarket” və başqa şirkətlər istifadə edirmiş. 

Paytaxt ətrafındakı ticarət mərkəzləri və anbarlarda baş verən yanğınlar ilk hal deyil. Ötən ilin avqustunda “Sədərək” ticarət mərkəzində başlayan yanğın nəticəsində 800 kvadratmetrlik ərazidə yerləşən 20 mağaza yanıb. Müxtəlif vaxtlarda “Binə” və “Laçın” ticarət mərkəzlərində, “Maşın bazarı”, “8-ci kilometr bazarı” və digər ərazilərdə də ciddi maddi zərərlə nəticələnən yanğınlar qeydə alınıb.

Bu hadisələrdən sonra adətən FHN tərəfindən araşdırma aparıldığı bildirilsə də, nəticələr və ya hər hansı şəxsin məsuliyyətə cəlb olunması ilə bağlı ictimaiyyətə məlumat verilmir. Yanğınların ardıcıl şəkildə təkrarlanması isə sosial şəbəkələrdə onların qəsdən törədildiyi ilə bağlı şübhələrin yaranmasına səbəb olur.

Hüquqşünas və AXCP funksioneri Murad Sultanlı “Toplum TV”-yə deyir ki, yanğınların ardıcıllığı və cəzasızlıq onların təsadüf olmadığını deməyə əsas verir. 

“Əlbəttə ki, əlimizdə konkret faktlar yoxdur deyə kimisə ittiham edə bilmərik, amma bütün bu silsilə, ardıcıl yanğınlara görə hesab edirəm ki, bu hadisələr təsadüfi deyil. Ticarət mərkəzləri ictimai yerlərdir, orada ilkin yanğına müdaxilə alətləri, avadanlıqları, erkən xəbərdarlıq və yanğın söndürmək üçün sistemlər quraşdırılıb. Üstəlik, bu tip yerlərdə 24 saat mühafizə xidməti və kamera-nəzarət sistemi var, ola bilməz ki, bu yerlərdə yanğın baş qaldırsın və ona dərhal müdaxilə etmək mümkün olmasın və ya ən azından xəbərdarlıq siqnalı işə düşməsin”, - o qeyd edib. 

Hüquqşünas düşünür ki, yanğınlar iş adamlarını hədəf almaq məqsədilə törədilə bilər. 

“Ölkədə sərmayənin tək ələ keçirilməsi, monopoliya, azad sahibkarlığın faktiki olaraq mümkün olmaması, istənilən iş adamının istənilən an hər şeydən məhrum edilə bilməsi, mülkiyyət toxunulmazlığının olmaması və s. səbəblər bütün iş adamları üçün açıq risklər yaradır. Sərmayənin kontrol edilməsi, sahibkarlığın nəzarətə alınması dövlətin bütün qanuni, maddi imkanlarının bəlli bir çevrələrə xidmət etməsi bütün bu şəraiti yaradan əsas səbəbdir. Demokratiya təkcə siyasi hüquqlar deyil, eyni zamanda azad sahibkarlıq hüquqlarıdır. Bizdə isə heç biri yoxdur və bu, o deməkdir ki, ictimai-siyasi fəallar kimi iş adamlarının da hüquq və azadlıqları yoxdur”, - o əlavə edib.