İranın xarici işlər naziri Seyid Abbas Əraqçı bu ilin əvvəlində keçmiş ali lider Seyid Əli Xameneinin ölümünə səbəb olan hücum zamanı özünün də həmin məkanda olduğunu deyib. 

İranlı jurnalist Cavad Moquyiyə danışan nazirin sözlərinə görə, hücum zamanı özü də dağıntılar altında qalıb. O xatırlayıb ki, ali liderin aparat rəhbərinin müavini Əli Əsgar Hicaziyə məruzə etmək üçün həmin iqamətgahda olub. 

"Partlayışdan sonra tavan, divarlar və hər şey üstümüzə çökdü. Mən cənab Hicazinin əlindən tutdum və kömək çağırışlarını eşidə-eşidə tirlər və taxta parçalarının arasından keçərək çıxmağa çalışdıq. Hər şey dağılmışdı. Nəhayət, bayıra çıxdıq və gördüm ki, kompleksin müxtəlif hissələri hədəfə alınıb", - o deyib. 

Əraqçınin xidməti avtomobili də zərbə aldığı üçün yoldan keçən bir nəfərin köməyi ilə özünü Xarici İşlər Nazirliyinə çatdırıb. O, növbəti üç gün ərzində digər administrasiya rəsmiləri ilə əlaqə saxlaya bilmədiyini söyləyib. 

Əraqçı bildirib ki, İran belə bir hücuma əvvəlcədən hazır idi və ali lider hədəf alınacağı təqdirdə strateji əhəmiyyət daşıyan Hörmüz boğazını bağlamaq üçün artıq plan hazırlanmışdı. 

Nazir İsrail və ABŞ-nin Xameneinin və digər yüksək vəzifəli rəsmilərin olduğu yer barədə dəqiq kəşfiyyat məlumatları olduğunu təsdiqləyib. 

"Bu, ehtimal ki, hələ də mövcud olan təhlükəsizlik boşluğuna işarə edir. Bu problem aradan qaldırılmalıdır", - o əlavə edib. 

Əraqçı yeni ali lider Müctəba Xamenei ilə hələ də görüşmədiyini deyib, lakin onun təyinatının "dünyaya rejimin siyasətində dəyişiklik olmayacağı barədə vacib mesaj verdiyini" bildirib. 

Fevralın 28-də ABŞ və İsrail İrana havadan hücumlar həyata keçirməyə başlayıb. Apreldə Pakistanın vasitəçiliyi ilə tərəflər arasında atəşkəs əldə olunsa da, anlaşma memorandumu yalnız ötən ay imzalanıb. 

İyulun 8-də isə ABŞ yenidən İrana zərbələr endirməyə davam edib. İran da cavab olaraq Fars körfəzi ölkələrində yerləşən ABŞ hərbi bazalarına dron hücumları edir.