Pakistan fevralın 27-ə keçən gecədən başlayaraq paytaxt Kabul da daxil olmaqla Əfqanıstana zərbələr endirib. 

Pakistan hökuməti bunu Əfqanıstana rəhbərlik edən Taliban qruplaşmasının bir gün öncə iki ölkənin sərhədi yaxınlığındakı Pakistan hərbi məntəqələrinə qarşı hərbi əməliyyat aparması ilə əsaslandırıb. 

Taliban isə öz növbəsində münaqişəni qarşı tərəfin başlatdığını iddia edib, Pakistan tərəfinin fevralın 22-də sərhədyanı ərazilərə hava zərbələri endirdiyini bildirib. 

Pakistanın baş naziri Şəhbaz Şərif ölkəsinin “istənilən aqressiv ambisiyanı məhv etmək üçün tam qabiliyyətə malik olduğunu” deyib. Müdafiə naziri Xavaca Asif isə Talibana qarşı “açıq müharibə” elan edib. 

Gün ərzində Kabulda ən azı üç dəfə partlayış səsləri eşidilib. Əfqanıstan hökumətinin sözçüsü Zəbiullah Mücahid deyib ki, Pakistan həm də cənubdakı Kəndəhar və cənub-şərqi Paktia vilayətlərinə hava zərbələri endirib.

Pakistanın baş nazirinin sözçüsü Moşərrəf Zaidi iddia edib ki, fevralın 27-i səhər baş verən hücumlarda 133 nəfər Taliban əsgəri öldürülüb, 200-dən çoxu isə yaralanıb.

Taliban hökuməti isə yalnız səkkiz döyüşçüsünün öldürüldüyünü, 11 nəfərin isə yaralandığını bildirib.

İki ölkənin ortaq sərhədi boyunca həftələrdir döyüşlər gedir və hər iki tərəf qarşı tərəfdən onlarla  insanı öldürdüyünü iddia edir.

Münaqişənin qızışması 2021-ci ildə Əfqanıstanda Taliban hakimiyyətə qayıtdıqdan bəri iki ölkə arasında gərginliyin artması fonunda baş verir.

2025-ci ilin oktyabrında iki ölkə Qətər və Türkiyənin vasitəçiliyi ilə, sərhəd boyunca bir həftə davam edən şiddətli və ölümcül toqquşmalardan sonra dərhal atəşkəs barədə razılığa gəliblər.

Əfqanıstanla Pakistan arasındakı sərhəd Durand xətti adlanır və 2,611 kilometr uzunluğundadır. Əfqanıstan bu sərhədi rəsmi olaraq tanımır və onun puştunların yaşadığı bölgələri qeyri-legitim şəkildə ayıran, müstəmləkə dövründə məcburi şəkildə çəkilmiş bir sərhəd olduğunu bildirir.

Qonşu ölkələr Talibanın 2021-ci ildə hakimiyyəti ələ keçirməsindən bəri tez-tez toqquşublar. Müşahidəçilər bildirir ki, 2021-ci ildən bu yana Əfqanıstan və Pakistan qüvvələri arasında azı 75 hərbi toqquşma baş verib.