İran prezidenti Məsud Pezeşkian ABŞ prezidenti Donald Trampın Roma Papası XIV Leoya qarşı tənqidlərini, habelə sosial mediada özünü İsa Məsihə oxşadan şəkil paylaşmasını qınayıb. 

"İranın böyük xalqı adından Zati-alinizə qarşı edilən təhqiri qınayıram və sülh və qardaşlıq peyğəmbəri olan İsanın təhqir edilməsinin heç bir azad insan üçün qəbulolunmaz olduğunu bəyan edirəm", - Pezeşkian "X" səhifəsində Papa Leoya xitabən yazıb.

ABŞ prezidenti və Roma Papası arasında qalmaqal aprelin 11-də dua mərasimində Papa Leonun Tramp administrasiyasının İrana qarşı hərbi hücumlarını qınaması ilə başlayıb. O deyib ki, "hər şeyə qadir olmaq barədə illüziya" münaqişəni qızışdırır. 

Papa bundan əvvəl də Trampın İran barədə "bütöv bir sivilizasiya öləcək" deyə hədəsini "tamamilə qəbulolunmaz" adlandırmışdı.

Tramp aprelin 13-də "Truth Social" platformasında papanı tənqid edən uzun yazı paylaşıb. 

“Papa Leo cinayətlə mübarizə mövzusunda zəifdir və xarici siyasətdə də çox pisdir... Mən İranın nüvə silahına sahib olmasına yaxşı baxan bir papa istəmirəm. Mən ABŞ-nin Venesuelaya hücumunu pisləyən bir papa da istəmirəm, çünki o ölkə ABŞ-yə böyük miqdarda narkotik maddə göndərir və daha da pisi -  həbsxanalarını boşaldaraq qatilləri, narkotik tacirlərini və cinayətkarları ölkəmizə göndərir. Mən ABŞ prezidentini tənqid edən bir papa da istəmirəm, çünki mən xalq tərəfindən böyük səs çoxluğu ilə seçilmişəm, cinayət faizlərini rekord dərəcədə aşağı salıram və tarixdəki ən böyük birja göstəricilərini yaradıram", - o qeyd edib. 

Tramp iddia edib ki, o prezident olmasaydı, Leo da papa olmayacaqdı. 

"Leo buna görə minnətdar olmalıdır, çünki hamı bilir ki, o, gözlənilməz şəkildə papa seçildi. O, siyahıda belə yox idi və yalnız amerikalı olduğu üçün, Tramp administrasiyası ilə münasibətləri idarə etmək xətrinə seçildi", - o əlavə edib. 

ABŞ prezidenti, həmçinin, aprelin 12-də özünü İsa peyğəmbərə oxşadan, süni intellektlə hazırlanmış foto paylaşıb. O, çoxsaylı tənqidlərdən sonra fotonu silsə də, özünü İsa peyğəmbər kimi təqdim etdiyini təkzib edib. 

"Fotoda mən insanları sağaldan həkim kimi təsvir olunuram. Çünki mən özüm insanların vəziyyətini yaxşılaşdırıram. Yalnız saxta xəbər mediası belə bir iddia yaya bilərdi", - o, Ağ Evdə jurnalistin sualına cavab olaraq deyib. 

Tarixdə ilk amerikalı Roma Papası olan Leo isə Trampa cavab olaraq bildirib ki, onun "sülh və barışıq çağırışları İncilə əsaslanır" və o, Tramp administrasiyasından "qorxmur.”

“Mən müharibəyə qarşı qətiyyətlə çıxış etməyə davam edəcəyəm, sülhü təşviq etməyə, problemlərin həlli üçün dövlətlər arasında dialoqu və çoxtərəfliliyi inkişaf etdirməyə çalışacağam", - o, təyyarədə AP müxbirinin sualına cavabında deyib. 

Afrikada 11 günlük səfərə çıxan Papa Leo daha əvvəl ABŞ və İsrailin İrana hücumlarına işarə edərək demişdi ki, "Tanrı müharibə aparanların dualarını eşitmir, əksinə onları rədd edir.”