Ukrayna və Macarıstan arasında münasibətlər gərginləşməyə davam edir. 

Ukrayna prezidenti Volodimir Zelenski martın 5-də jurnalistlərlə söhbətində Macarıstana eyham vuraraq deyib ki, Avropa İttifaqının (Aİ) Ukraynaya ayırdığı 90 milyard avroluq krediti bu ölkənin bloklamayacağına ümid edir. 

"Ümid edirik ki, Avropa İttifaqındakı bir nəfər 90 milyardı bloklamağa davam etməyəcək və Ukrayna əsgərləri silahlarla təmin olunacaqlar. Əks halda, biz o şəxsin ünvanını öz silahlı qüvvələrimizə verəcəyik. Gedib onunla danışsınlar, öz dillərində başa salsınlar", - o deyib.

Macarıstan baş naziri Viktor Orban həmin gün Budapeştdə çıxışında Zelenskinin açıqlamasını "hədə-qorxu" adlandırıb, lakin geri çəkilməyəcəyini deyib. O, Macarıstan müxalifətini də Zelenski ilə həmrəy olmaqda ittiham edib. 

"Zelenskinin Macarıstanı təhdid etdiyi bir zamanda Macarıstan müxalifəti Kiyev və Brüsselin tərəfindədir. Onların planı Macarıstanda Ukraynayönümlü hökuməti hakimiyyətə gətirməkdir ki, Macarıstanın pulunu Ukraynaya göndərsinlər və bizi ucuz enerjidən məhrum etsinlər. Biz isə öz millətimizin maraqlarını qoruyacağıq. Buna arxayın ola bilərsiniz", - o deyib.

Macarıstan Ukraynanı bu ölkənin ərazisindən keçən "Dostluq" boru kəmərini zədələməklə Macarıstana Rusiya neftinin nəqlini qəsdən dayandırmaqda ittiham edir. 

Kiyev isə bildirir ki, boru kəməri yanvarda Rusiyanın dron hücumu nəticəsində zədələnib və kəməri mümkün qədər tez bərpa etməyə çalışırlar. Zelenski martın 5-də deyib ki, boru kəməri təxminən bir ay yarım ərzində işlək vəziyyətə gələ bilər. 

Lakin Ukrayna prezidenti ironiya ilə onu da deyib ki, Rusiya tərəfindən "ölümcül hücumlarla üzləşdiyimiz bir vaxtda biz yazıq balaca Orbana neft verməliyik ki, əks halda o, seçkiləri uduzacaq?" 

Macarıstanda aprelin 12-də parlament seçkiləri keçiriləcək. Orbanın rəhbərlik etdiyi partiya seçki təbliğatında Ukrayna müharibəsinə istinad edən plakatlardan istifadə edir, müxalifətin hakimiyyətə gələcəyi təqdirdə ölkənin gəlirlərini Ukraynaya verəcəyini iddia edir. 

Orban daha öncə Ukraynadan hücum təhlükəsi olduğunu iddia edərək ölkəsinin əsas enerji infrastrukturu obyektlərində əlavə təhlükəsizlik tədbirləri görülməsi barədə göstəriş verib.

Digər Avropa ölkələri liderlərindən fərqli olaraq, Ukraynaya qarşı müharibə aparan Rusiya ilə yaxın münasibətlər saxlayan Orban iddia edir ki, Ukrayna hökuməti Macarıstana təzyiq göstərmək üçün “neft blokadası”ndan istifadə edir. 

2022-ci ilin fevralında Rusiyanın Ukraynada işğalçı müharibəyə başlamasından bəri əksər Avropa ölkələri Rusiyadan enerji idxalını ciddi şəkildə azaldıb və ya tamamilə dayandırıb. Lakin Macarıstan və Slovakiya Rusiya nefti və qazının idxalını nəinki saxlayıb, hətta artırıb. 

Macarıstan Avropa İttifaqı (Aİ) tərəfindən Kiyevə ayrılmış 90 milyard avroluq krediti bloklayır və Rusiyaya qarşı yeni Aİ sanksiyalarını veto edir. Orban ölkəsinə neft tədarükləri bərpa olunana qədər Ukrayna üçün yardım məqsədilə ediləcək digər Aİ tədbirlərini bloklamağa söz verib.