Ötən ilin iyununda paytaxtın "Baksol yolu" adlanan ərazisində 27 yaşlı gəncin ölümü ilə nəticələnən yol çöküntüsündə təqsirləndirilən, Bakı Su Kanal İdarəsinin sahə rəisi Azər Cümşüdovun işi üzrə növbəti məhkəmə prosesi keçirilib.

APA-nın xəbərinə görə, fevralın 3-də Nərimanov Rayon Məhkəməsində hakim Gültəkin Əsədovanın sədrliyi ilə keçirilən prosesdə A.Cümşüdov dövlət ittihamçısının suallarını cavablandırıb. 

A.Cümşüdov bildirib ki, həmin ərazidə mayın 14-də də çökmə baş verib. 

"Operativ idarəetmə mərkəzindən bizə çökmə ilə bağlı məlumat verildi. Biz də ərazini qanuna uyğun olaraq lentləyib, müvafiq xəbərdaredici nişanlar qoyduq. İyunun 4-də rəhbərlikdən dedilər ki, o ərazidən çıxın, daha sizin orada işiniz qalmayıb", - sahə rəisi deyib. 

Dövlət ittihamçısı bədbəxt hadisənin videosunda lentlərdən başqa heç nəyin görünmədiyini soruşduqda, A.Cümşüdov xəbərdarlıq nişanlarının sahibkarlar tərəfindən götürüldüyünü iddia edib. 

"Biz həmin ərazini lentlədikdən sonra sahibkarları xəbərdar etdik. Onlar isə xəbərdarlığa məhəl qoymayaraq işarələri sökdü. Ərazinin üzərinə kosmetik dikt taxta töküblər və hətta təmir materialları qoyublar. Yol da ağırlığa dayanmayıb, çöküb", - o qeyd edib. 

Daha sonra zərərçəkən tərəfin vəkilinin suallarını cavablandıran A.Cümşüdov çökmə ilə bağlı rəhbərliyə dəfələrlə xəbərdarlıq etdiyini söyləyib. 

"Dəfələrlə rəy vermişəm ki, həmin ərazi qəzalı vəziyyətdədir, materiallar sovet dövründən, 1986-cı ildən qalıb, yenilənməlidir. Hətta ona yaxın ərazidə daha öncə çökmə də olub, təmir etmişik. Hissə-hissə təmir işləri aparırdıq. O ərazi ilə bağlı danışanda dedilər ki, material yoxdur", - o bildirib. 

Ölən gəncin anası isə məhkəmədə çıxışında deyib ki, şikayətini geri götürməsi üçün ona öz qohumları tərəfindən hədə-qorxu gəlinir. 

"Qaynım Vidadi Abbasov "Azərsu"da rəhbər vəzifədə işləyir. Oğlu məni təhdid elədi ki, şikayətimi geri çəkim. Bacım mətbuata açıqlama verdi deyə məni təhqir etdilər ki, niyə ictimailəşdirmisən? Su Kanal İdarəsində çalışan İntiqam adlı şəxs də mənə dedi ki, boşuna əziyyət çəkirəm: "Onsuz da yazığın birini tutacaqlar. Gəl, şikayət etmə, sənə köməklik edək". Onların qaynımla əlbir olduqlarını düşünürəm", - o iddia edib. 

A.Cümşüdov da bildirib ki, məsuliyyətə cəlb olunmağından prosesin ən sonunda xəbər tutub: "Məni prokurorluğa lap axırda çağırdılar. Dedilər ki, şahid qismində ifadə verəcəksən. Bir gün qalmış isə ittiham verdilər. Mənim günahım yoxdur. Əgər azacıq da olsa, təqsirliyəmsə, cəzamın 10 qatını çəkməyə razıyam." 

Onun vəkili Anar Ramazanov rəhbər şəxslərin məhkəmədə dindirilməsi üçün vəsatət verəcəyini deyib. 

Növbəti proses fevralın 17-nə təyin edilib.

Ötən il iyun ayında "Baksol yolu" ərazisində yolun çökməsi nəticəsində kanalizasiyaya düşən Cümşüd Cümşüdlünün meyiti iyunun 28-də Hövsan qəsəbəsində kollektorda tapılmışdı.