Fevralın 6-da Bakı Ağır Cinayətlər Məhkəməsində Azərbaycan Xalq Cəbhəsi Partiyasının (AXCP) sədri Əli Kərimlinin ictimai əsaslarla mühafizəçisi olmuş Novruz Tağıyevin işi üzrə növbəti məhkəmə prosesi keçirilib. 

"Azadlıq" qəzetinin xəbərinə görə, hakim Vüqar Quliyevin sədrlik etdiyi prosesdə N.Tağıyev, zərərçəkmiş qismində tanınan Nicat Abbasov və şahidlər dindirilib. 

N.Tağıyev ifadəsində özünü heç bir şəkildə təqsirli bilmədiyini və siyasi fəaliyyətinə, məhz Əli Kərimlinin mühafizəçisi olduğuna görə şərlənib həbs edildiyini bildirib. 

O deyib ki, həbs olunduğu gün mülki geyimli polislər onu maşında günorta saat 1 radələrindən axşam saat 8-ə kimi şəhərin müxtəlif yerlərində gəzdirərək "yuxarı"dan zəng gözləyiblər. 

"Əvvəl gələn zəngdən sonra şəhərin hansı ərazisində düşmək istədiyimi soruşub, azad edəcəklərini bildirdilər. Amma daha bir zəngdən sonra plan dəyişdi və aparıb polis idarəsinə təhvil verdilər", - o xatırlayıb.

N.Abbasov ifadəsində bildirib ki, makler işləyən N.Tağıyevə ev almaq üçün  70 min manat pul verib. Müdafiə tərəfinin sualından sonra aydın olub ki, o, verdiyini iddia etdiyi pulu notarial qaydada rəsmiləşdirməyib. Bu isə zalda gülüşlərə səbəb olub. Hakim N.Abbasovdan 70 min manatı niyə sənədləşdirmədən N.Tağıyevə verdiyini soruşub. O isə sadəcə olaraq N.Tağıyevə etibar etdiyini deyib. 

Digər şahidlərin ifadəsində də N.Tağıyevin təqsirli olduğu barədə heç bir fikir səsləndirilməyib.

Növbəti məhkəmə prosesi fevralın 27-ə təyin olunub. 

N.Tağıyev ötən il mayın 20-də polis tərəfindən saxlanılıb və barəsində həbs qətimkan tədbiri seçilib. 

Ona qarşı əvvəlcə Cinayət Məcəlləsinin 178.2-ci (dələduzluq – etibardan sui-istifadə etmə və ya aldatma yolu ilə özgənin əmlakını ələ keçirmə və ya əmlak hüquqlarını əldə etmə) maddəsi ilə ittiham irəli sürülüb. Dekabrda isə o, əlavə olaraq Cinayət Məcəlləsinin 320-ci maddəsi (vəsiqə və ya digər rəsmi sənədi saxtalaşdırma və ya qanunsuz hazırlama, satmaq) ilə təqsirləndirilib.

N.Abbasov ibtidai istintaqda ifadəsində N.Tağıyevin onun 70 min manat pulunu mənimsədiyini iddia edib. 

AXCP fəalı isə daha öncə vəkili vasitəsilə ictimaiyyətə bildirib ki, N.Abbasov ona ev almaq üçün sözügedən məbləği verməyə çalışsa da, o, pulu götürməyib. 

Əli Kərimli həmin vaxt mühafizəçisinə qarşı ittihamı “qurama, həyasız, məqsədli üzədurma” adlandırmışdı. “İndiki zamanda hansı ev alan şəxs evin pulunu ev sahibinə yox, maklerə, həm də rəsmiləşdirilmədən və notarial təsdiqsiz verir?”, - o, sosial media hesabında yazmışdı. 

Hazırda AXCP-nin Ə.Kərimli də daxil olmaqla 20-yə yaxın üzvü uzunmüddətli həbsdədir.