Son bir həftədə üç bloger İnzibati Xətalar Məcəlləsinə əlavə olunan yeni maddəni pozmaqda təqsirli bilinərək saxlanılıb.

Fevralın 17-də "Unikal. org"un yaydığı xəbərə görə, "TikTok" platformasında "Serdar inanki" hesabı ilə yayımlar edən Sərdar Məcnunov saxlanılıb. 

Onun barəsində İnzibati Xətalar Məcəlləsinin 510.2-ci (internet informasiya ehtiyatında və ya informasiya-telekommunikasiya şəbəkəsində kütləvi nümayiş etdirildiyi halda ictimai mənəviyyatı təhqir edən, cəmiyyətə açıqca hörmətsizlik ifadə edən hərəkətlərin edilməsinə, yəni əxlaqsız ifadələrin səsləndirilməsinə və ya belə məzmun təəssüratı yaradan jestlərin edilməsinə, yaxud insan bədəninin hissələrinin əxlaq normalarına və milli-mənəvi dəyərlərə zidd formada göstərilməsinə görə) maddəsi ilə protokol tərtib edildikdən sonra bloger məhkəməyə çıxarılıb. Qaradağ Rayon Məhkəməsində keçirilən prosesdə ona 20 sutka həbs cəzası verilib. 

Daha öncə isə "Qafqazinfo"nun yaydığı xəbərə görə, adı açıqlanmayan Hüseynli soyadlı bloger Bakıda kafedə videolar çəkib sosial şəbəkələrdə paylaşdıqdan sonra həbs olunub. 

Onun barəsində də eyni maddə üzrə protokol tərtib edilib. Fevralın 10-da Nərimanov Rayon Məhkəməsi blogerə 1 ay inzibati həbs cəzası verib. 

Əlavə olaraq, "Unikal"ın xəbərinə görə, "TikTok"da "Renka" hesabını işlədən Rəna Cəfərova adlı bloger də eyni maddənin pozuntusu üzrə saxlanılıb. Lakin himayəsində azyaşlı uşaq olduğu üçün o, 750 manat cərimə edilib.

İnzibati Xətalar Məcəlləsinin 510.2-ci maddəsi bu ilin yanvarın 26-dan qüvvəyə minib. 

Maddədə qeyd olunan pozuntulara yol vermiş şəxslər beş yüz manatdan min manatadək məbləğdə cərimə edilə və ya otuz günədək müddətə inzibati qaydada həbs oluna bilər. Pozuntunu bir il ərzində təkrar törədənlər isə min manatdan iki min manatadək məbləğdə cərimə ediləcək və ya bir aydan iki ayadək müddətə inzibati qaydada həbs olunacaq.

Hüquqşünaslar isə bildirir ki, Azərbaycanda "əxlaq" və "mənəvi dəyərlər" anlayışlarını tərif edən qanunvericilik yoxdur və bu, maddədən sui-istifadəyə gətirib çıxara bilər.