Bakı Ağır Cinayətlər Məhkəməsində Premium bankın filial müdiri Nəzakət Məmmədxanovanın məhkəməsi keçirilir. Məhkəmə prosesinə hakim Cavid Hüseynov sədrlik edir.

Nəzakət Məmmədxanova bankın 5 saylı filial müdiri olub. Onun xəzinədəki 461 min manatı kriptovalyuta üzərindən dələduzluq edənlərə verdiyi, pulu geri ala bilmədikdə özünü öldürməyə cəhd etdiyi bildirilir. Onunla bərabər xəzinədar Samirə Əliyeva da müttəhimlər kürsüsündədir.

Məhkəmə iclasında ifadə verən Nəzakət Məmmədxanova deyib ki, 2020-ci ildən Premium Bankın 5 saylı filialının müdiri işləyib. Ümumilikdə isə 9 il adıçəkilən bankda, 14 il Beynəlxalq Bankda çalışıb. Deyir ki, investisiya yatırmaq üçün ötən il sosial şəbəkələrlə elan paylaşıb, elə hər şey də bundan sonra başlayıb:

“Main Capital.com saytından zəng gəldi. Özünü Artyom adı ilə təqdim edən şəxs dedi ki, qoyduğun pulun iki qatını asanlıqla geri götürə bilirsən. Mən də ilkin olaraq yatırım kimi 100 dollar qoydum, qısa zamanda 200 dollar götürdüm. Növbəti dəfə 1235 dollar qoydum, ikiqatını götürdüm. Sonra məbləği artırdım, keçdim bankın pullarına. Onlar da bunu bildikləri üçün keçdilər məni şantaj etməyə. Hədələyirdilər ku, pul qoymasam, banka zəng edəcəklər. Mən bankda mədaxil qəbzləri yazaraq həmin pulları kart vasitəsilə “M10”-la onlara göndərirdim. Samirə xanımı da mən problemə salmışam. İlk olaraq əməliyyatçı Nigar Qasımovaya, sonra Fərid Səttarova dedim ki, pulları mənim plastik kartıma göndərin. Onlar da mədaxil yazaraq qəbzləri mənim kabinetimə gətirirdilər”.

Nəzakət Məmmədxanovanın məhkəmədə dediyinə görə, beləcə, 200 min manat gedəndən sonra xəzinədar Samirə Əliyeva etirazını bildirib və pul verməkdən imtina edib. Təqsirləndirilən şəxs ifadəsinə belə davam edib:

“Dedi ki, artıq kassada nağd pul qalmayıb. Əvvəl ümid edirdim ki, qoyduğum pullar geri qayıdacaq, ancaq son vaxtlar bu ümidim günbəgün azalırdı. Elə vəziyyətə düşmüşdüm ki, Samirənin iş otağında özümü qayçıyla öldürmək istəyirdim”.

İşin üstü də elə xəzinə boşalandan sonra açılıb. İstintaq orqanı filial müdiriylə əlbir olmaqda şübhəli bildiyi xəzinədarla qəbzləri yazan əməkdaşı da həbs edib və hazırda eyni müttəhimlər kürsüsündə əyləşiblər.

Nəzakət Məmmədxanova onu da bildirib ki, çarəsiz qalanda Kibercinayətkarlıqla Mübarizə İdarəsinə müraciət edib. Hazırda isə  Qusardakı 22, Goradildəki 12 sot torpaqa olan evlərini satışa çıxarıb ki, satıb banka vurduğu zərəri ödəsin.

Bu iş üzrə ibtidai istintaqı Baş Prokuror yanında Korrupsiyaya Qarşı Mübarizə Baş İdarəsi aparıb. İstintaqın gəldiyi qənaətə görə, “Premium Bank” ASC-də filial müdiri işləyən Nəzakət Məmmədxanova bu il mayın 8-dən 23-dək 5 saylı filialın 461 min 170 manat pulunu mənimsəyib. 32 mədaxil qəbzi əsasında həmin məbləği özününün hesab nömrəsindən “M10” proqram təminatında istifadəsində olan mobil nömrə vasitəsilə ayrı-ayrı şəxslərdən kriptovalyuta alaraq internet üzərindən kritovalyuta alqı-satqısının həyata keçirildiyi “Binance.com” internet saytında öz hesabına yerləşdirib.