Ermənistan baş naziri Nikol Paşinyan Erməni Apostol Kilsəsinin ruhanilərini və müxalifəti təhqir etdiyinə görə ictimaiyyətdən üzr istəyib. 

Onun üzrxahlığı Korrupsiyaya Qarşı Mübarizə Komissiyasının qərarından sonraya təsadüf edib. Komissiya bildirib ki, Paşinyan sözügedən iki qrupu təhqir etməklə məmurlar üçün nəzərdə tutulan etik davranış qaydalarını pozub.

Komissiya araşdırmanı Paşinyanın may ayında biri onlayn, biri Ermənistan parlamentində olmaqla etdiyi iki çıxışla bağlı başlatmışdı. 

13 avqust tarixli qərarı ilə komissiya Paşinyanın etik davranış qaydalarını pozduğunu müəyyənləşdirib.

Komissiyanın sorğusuna cavab olaraq, baş nazir baş verənlərə görə təəssüfünü bildirib, qeyd edib ki, onun açıqlamaları yalnız siyasi debat çərçivəsində səslənib və şəxsi təhqir və ya hədələmə niyyəti daşımayıb.

Paşinyan üzrünü sosial şəbəkədə dərc edərək qeyd edib ki, çıxışında etik davranış qaydalarının pozulması ilə bağlı komissiyanın qərarına və onun üzr istəməsinə baxmayaraq, o, həmin qərarlardakı bəzi qiymətləndirmələrlə “tamamilə razı deyil”.

Yalnız təhqirlərə görə üzr istədiyini vurğulayan Paşinyan bildirib ki, “siyasi, mənəvi və əxlaqi prinsiplərin bərpa olunması məqsədi” və bu məqsədə xalqın dəstəyi ilə nail olmaq iradəsi “sarsılmazdır” və bu, Ermənistanın “siyasi, hüquqi və mənəvi təhlükəsizliyi üçün həyati zərurətdir”.

Mayın 7-də parlamentdə gedən qızğın müzakirə zamanı korrupsiya ittihamlarına cavab verən Paşinyan əsəblərinə hakim ola bilməmişdi.

“Siz, ümumiyyətlə, bu zalda nə edirsiniz? Mətbuatda yazılanlar düz olsaydı, hamınızı sürüyüb Milli Təhlükəsizlik Xidmətinin zirzəmisinə atmalı olardım”, - o deyib.

Digər mübahisəli açıqlama isə 30 may tarixində, hökumət ilə Erməni Apostol Kilsəsi arasında davam edən qalmaqal fonunda səsləndirilib. 

Həmin gün Paşinyan sosial şəbəkədəki paylaşımında ad çəkmədən yüksək rütbəli bir din xadimini “əmisi arvadı ilə yatağa girməkdə” ittiham edib.

Paşinyanın bu cür ifadələr işlətməsi Ermənistan cəmiyyətində gözlənilməz qarşılanıb və yüksək vəzifəli bir rəsmidən belə dilin istifadəsi geniş tənqidlərə səbəb olub.