Azərbaycanda həbsdə olan Qarabağdakı separatçıların keçmiş "dövlət naziri" Ruben Vardanyan həbsxanadan audio müraciət göndərib.

O, müraciətində aclıq aksiyasının 23-cü günündə olduğunu deyib və artıq aksiyanı dayandırdığını elan edib. 

Səs yazısında Vardanyan aclıq aksiyasına başlamaq qərarını izah edib. 

“Göstərmək istəyirdim ki, mühakimə olunan mən yox, bütün ermənilər və dövlətin özüdür. Göstərmək istəyirdim ki, ürəyində burada qalıb yaşamaqdan məmnun olanlar hansı bədəli ödəməlidir”

Vardanyan baş tutan sonuncu məhkəmə prosesindən də danışıb və ona qarşı şahidlik edən Xankəndi sakinlərini vurğulayıb. 

“Dünən məhkəmədə Stepanakertdə yaşayan iki Artsax ermənisi müxtəlif, çox düzgün olmayan şeylər iddia edərək mənə qarşı ifadə verdilər. Onlar məni həyatlarında heç vaxt görməyiblər və özləri də çox dəhşətli vəziyyətdə idilər. Buna baxmayaraq, məhkəmədə danışdılar. Onlara çox yazığım gəldi”, o deyib.

 O müraciətində hazırkı Ermənistan rəhbərliyini də tənqid edib. 

“Mən Ermənistanın hazırkı rəhbərliyinin Artsax xalqına qarşı nifrətinin dərinliyinə heyranam və şadam ki, onların planını həyata keçirməsinə mane oldum. Onlar Artsaxın həm indiki, həm də keçmiş bəzi liderlərinə qarşı tərəfin yazdığı ssenarini həyata keçirməyə kömək etdilər”.

Vardanyan aclığın 23-cü günündə aksiyanı dayandırdığını bildirib və ona qoşulan bütün şəxslərdən də aclığı dayandırmasını istəyib. 

“Vəsatətlərimə, tələblərimə baxmaq üçün qanuni hüquqlarımdan növbəti dəfə imtina edilməsi, burada məhkəmənin olmayacağını, nəyin qanuni, nə qanunsuz olmasından asılı olmayaraq bu şounun davam etdiyini göstərir”.

R.Vardanyana Cinayət Məcəlləsinin 100-cü (təcavüzkar müharibə başlama və ya aparma), 107-ci (əhalini deportasiya etmə və məcburi köçürmə), 115.2-ci (müharibə qanunlarını və adətlərini pozma), 116-cı (silahlı münaqişə zamanı beynəlxalq humanitar hüquq normalarını pozma), 120-ci (qəsdən adam öldürmə) və başqa maddələriylə ittiham verilib.

R.Vardanyanla yanaşı, hazırda Bakıda həbsdə olan Qarabağ separatçıları – "Dağlıq Qarabağ Respublikası"nın prezidenti olmuş Arayik Harutyunyan, Arkadi Qukasyan, Bako Sahakyan, keçmiş "xarici işlər naziri" Davit Babayan, "parlament sədri" Davit İşxanyan və digərlərindən ibarət daha 15 nəfərin də məhkəməsi gedir. 

Vardanyan tək, onlarsa birlikdə mühakimə olunurlar.

Bu cinayət işi üzrə zərərçəkmiş qismində tanınan şəxslərin sayı yarım milyon nəfərdən çoxdur. Onlar Qarabağ müharibəsində həyatını itirənlərin hüquqi varisləri, xəsarət alanlar, məcburi köçkün olanlar və başqa şəxslərdir. 

Nazirlər Kabineti Aparatının rəhbəri Rüfət Məmmədov da Azərbaycan dövləti adından zərərçəkmiş qismində məhkəməyə qatılıb.

Harutyunyan və onunla mühakimə olunan daha 14 nəfərə 2 min 548 epizod üzrə terrorçuluq, soyqırımı, təcavüzkar müharibə başlama, işgəncə, qəsdən adam öldürmə də daxil, onlarla maddə ilə ittiham verilib. 

Bu maddələrdə 20 ilədək və ya ömürlük həbs cəzası nəzərdə tutulub