Rusiyanın tanınmış hökumətyönlü siyasi şərhçisi Sergey Markov öz ölkəsində “xarici agent” elan edilib. 

"Xarici agent"lərin reyestrini aparan Rusiya Ədliyyə Nazirliyi bildirib ki, Markov siyahıya “xarici agent” və ya “arzuolunmaz” elan olunmuş şəxslərin və təşkilatların məlumatlarını yaratmaq və yaymaq, həmçinin xarici media orqanlarına müsahibələr verdiyinə görə salınıb.

Rusiya 2012-ci ildə “xarici agentlər” haqqında qanunu qəbul edib və bu qanun geniş şəkildə müstəqil media və vətəndaş cəmiyyətinə qarşı təzyiq vasitəsi kimi qiymətləndirilir.

Markov "Telegram" kanalında özünü müdafiə edərək, bu qərarın "The Washington Post" da daxil olmaqla Qərb mediasında ondan sitat gətirilməsi ilə bağlı ola biləcəyini iddia edib.

“Mən "xarici agent" deyiləm. Bunu hamı yaxşı bilir. 25 ildir ki, Vladimir Putinin siyasətini dəstəkləyirəm və dəstəkləməyə davam edirəm. Mən, həmçinin, Kanada sanksiyaları altındayam”, – Markov yazıb.

Ukraynaya qarşı tammiqyaslı işğalı qətiyyətlə dəstəkləyən Markov, eyni zamanda, Rusiya mediasında ardıcıl olaraq Azərbaycanı müdafiə etməsilə tanınır. 

Bu ilin əvvəlində Markov Azərbaycanda keçirilən qlobal media forumunda iştirak edib və Azərbaycan prezidenti İlham Əliyevi “çox müdrik” və “müasir dünyanın ən təcrübəli liderlərindən biri” adlandırıb. 

Markovun bu açıqlamaları Rusiyada digər hökumətyönlü təbliğatçılar tərəfindən ciddi mənfi reaksiyalara səbəb olmuşdu.

Forumdan qısa müddət sonra tanınmış Kreml təbliğatçısı Vladimir Solovyov bəyan etmişdi ki, Markovu artıq Rusiya xəbər proqramlarına dəvət etmək olmaz və o, “xarici agent” kimi tanınmalıdır.

Rusiya və Azərbaycan arasında münasibətlər ötən ilin dekabrın 25-də AZAL təyyarəsinin qəzaya uğramasından sonra pisləşib. Azərbaycan prezidenti İlham Əliyev təyyarənin Rusiya ordusu tərəfindən vurulduğunu iddia edib. 

Bu ilin iyununda isə Rusiyada azərbaycanlılara, ardınca Azərbaycanda rus vətəndaşlara qarşı reydlər və həbslər başlayıb.