Fevralın 13-14-də Ermənistanın Tsaxkadzor şəhərində bu ölkədən və Azərbaycandan olan nümayəndələrin iştirakı ilə “Sülh Körpüsü” təşəbbüsü çərçivəsində növbəti tədbir keçirilib. 

Bu dəfə Azərbaycandan olan qeyri-hökumət təşkilatları (QHT) nümayəndələri və ekspertlər Azərbaycanın Aşağı Əskipara kəndi ilə Ermənistanın Voskepar kəndi arasında delimitasiya və demarkasiya olunmuş quru sərhədindən keçməklə Ermənistana daxil olublar. 

Erməni nümayəndə heyətinin yaydığı pres-relizə əsasən, bu keçid iştirakçılar tərəfindən “etimadın möhkəmləndirilməsi istiqamətində mühüm praktiki addım və iki ölkə arasında normallaşma prosesində tədrici irəliləyişin aydın göstəricisi kimi qiymətləndirilib”.

Əvvəlki görüşlərdə iştirak üçün nümayəndələr təyyarə ilə və ya Gürcüstandan keçməklə səfər etmişdilər. 

Dəyirmi masa formatında baş tutan tədbirdə Azərbaycandan 19, Ermənistandan 20 nəfər iştirak edib. Əvvəlki görüşlərdə hər iki tərəfdən 5 nəfər iştirak etmişdi. 

Pres-relizdə vurğulanır ki, iki gün davam edən tədbirdə müzakirələr Azərbaycan-Ermənistan münasibətlərinin hazırkı mərhələsi və gələcək istiqamətləri, sülh gündəliyinin icrası və bunun region üçün nəticələri ətrafında olub. 

“İştirakçılar dəyişən regional təhlükəsizlik mühiti və sülh prosesi nəticəsində yaranan iqtisadi imkanlar barədə fikir mübadiləsi aparıblar. Bir sessiya dialoq iştirakçıları arasında əməkdaşlığa, o cümlədən birgə layihələrə, ictimai kommunikasiya strategiyalarına və cəmiyyətlərarası qarşılıqlı əlaqə mexanizmlərinə həsr olunub.

Etimad quruculuğu tədbirlərini, ictimai diplomatiyanı və cəmiyyətlər səviyyəsində yaxınlaşmanı dəstəkləyən praktiki tövsiyələrin hazırlanmasına xüsusi diqqət yetirilib. Regional təhlükəsizlik, sərhədlər və kommunikasiya xətləri ilə bağlı məsələlər də geniş şəkildə müzakirə olunub, hər iki tərəf öz mövqelərini və gözləntilərini təqdim edib.

Rəsmi sessiyalarla yanaşı, qeyri-rəsmi mədəni və sosial tədbirlər də şəxsi əlaqələrin inkişafına və konstruktiv atmosferin formalaşmasına töhfə verib”, - deyə qeyd olunub. 

Proqram çərçivəsində iştirakçılar Ermənistan Təhlükəsizlik Şurasının katibi Armen Qriqoryan və xarici işlər nazirinin müavini Vahan Kostanyan da daxil olmaqla yüksək vəzifəli erməni rəsmilərlə də görüşüblər.

Bu və əvvəlki görüşlərdə iştirak etmiş Topçubaşov Mərkəzinin direktoru Rusif Hüseynov sosial media hesabında səfərlə bağlı yazıb ki, digər ölkəyə səfərlərin “özü-özlüyündə qeyri-adi fenomen olmaqdan çıxaraq normal praktikaya çevrilməsi artıq böyük uğur sayıla bilər”.

“Belə bir ziyarətin baş tutması, ziyarət daxilində müxtəlif yaş kateqoriyalarına və dünyagörüşlərinə aid insanların həm rəsmi, həm də qeyri-rəsmi səviyyədə ünsiyyət qurması artıq bir sıra psixoloji baryerlərin sındırılması, “bu barbarlar ancaq bir-birini qıra bilər və heç vaxt dinc şəkildə danışa bilməzlər” kimi onillərlə davam etmiş səthi fikirlərin rədd edilməsi demək deyilmi?”, - o bildirib. 

Beynəlxalq Böhran Qrupunun Cənubi Qafqaz üzrə analitiki Coşua Kuçera “Toplum TV”-yə açıqlamasında deyir ki, bu görüşlər özlüyündə “böyük nəticələr verməyə bilər, lakin onlar daha geniş bir prosesin tərkib hissəsidir və bu kontekstdə yaxşı bir addımdır”. 

“Bu cür görüşlər yaxşı başlanğıcdır və ümid edə bilərik ki, zaman keçdikcə onlarda iştirak edən insanların dairəsi daha da genişlənəcək. Ən əsası isə, bunlar vəziyyətin dəyişdiyinə, proseslərin açılışmağa başladığına dair bir siqnaldır. Hərçənd ki, bu dəyişikliklər kiçikdir, onlar hələ bir il əvvəl heç kimin gözləmədiyi şəkildə baş verir”, - o qeyd edib. 

“Sülh Körpüsü” çərçivəsində ilk görüş ötən il oktyabrın 22-də, Azərbaycandan olan QHT rəhbərlərinin Yerevana səfəri ilə baş tutub. Noyabrda isə Ermənistandan olan heyət Bakıya səfər edib.

Daha öncə “Toplum TV”-yə danışan təhlilçilər Azərbaycandakı müstəqil vətəndaş cəmiyyəti üzvlərinin bu prosesdən kənarda qalmasına işarə edərək, prosesin dövlətlər tərəfindən monopoliyaya alınmasını tənqid ediblər. 

Hazırda Azərbaycanda çoxsaylı müstəqil vətəndaş cəmiyyəti üzvü Cinayət Məcəlləsinin bir neçə maddəsi üzrə “QHT işi” çərçivəsində, sülh fəalları Bəhruz Səmədov və Emin İbrahimov isə dövlətə xəyanət ittihamı ilə həbsdə saxlanılır.