Həbsdə olan gənc alim və tədqiqatçı İqbal Əbilovun rus dilində qələmə aldığı ilk şeirlər toplusu çapdan çıxıb.

Yaxınlarının məlumatına görə, 104 səhifə həcmində olan kitab 200 nüsxə tirajla Polşanın Varşava şəhərində fəaliyyət göstərən “JKB Print” nəşriyyatı tərəfindən nəşr edilib.

Kitab ötən il dekabrın 13-də həbsxanada intihar etdiyi bildirilən Azərbaycan Xalq Cəbhəsi Partiyasının (AXCP) üzvü Elbəyi Kərimlinin xatirəsinə həsr olunmuş şeirlə başlayır.
Elbəyi Kərimli 2023-cü ilin avqustunda keçmiş prezident Heydər Əliyevin heykəlinin üzərinə “Stalin” yazdıqdan sonra həbs edilmişdi. O, narkotik ittihamı ilə təqsirli bilinərək 6 il müddətinə azadlıqdan məhrum olunmuşdu.

Nəşrdə yer alan əsərlər bədii üslub və məzmun baxımından modernizm və klassik poeziya ənənələrinin sintezini əks etdirir. Ədəbi nümunələrdə bəzi hallarda Tomas Sterns Eliot və Ezra Paund yaradıcılığının dolayı təsiri müşahidə olunsa da, müəllifin fərdi poetik üslubu və özünəməxsus baxışı ön planda qalır.

İqbal Əbilova ötən il mayın 20-də Lənkəran Ağır Cinayətlər Məhkəməsində 18 il həbs cəzası verilib.
Belarusda yaşayan tədqiqatçı 2024-cü il iyulun 22-də Azərbaycana qohumlarının yanına səfəri zamanı saxlanılıb.

İttihama görə, o, Ermənistan xüsusi xidmət orqanları ilə əməkdaşlıqda, razılaşdırılmış şəkildə Azərbaycanda milli zəmində nifrət yaratmaq cəhdində günahlandırılır. Əbilova qarşı Cinayət Məcəlləsinin 274-cü (dövlətə xəyanət), 281.3-cü (dövlət əleyhinə yönələn açıq çağırışlar – xarici təşkilatların tapşırığı ilə törədildikdə) və 283.1-ci (milli, irqi, sosial və ya dini nifrət və düşmənçiliyin salınması) maddələri ilə ittiham irəli sürülüb.

İ.Əbilovun Hüquqlarını Müdafiə Komitəsi bəyan edib ki, o, heç bir siyasi fəaliyyətdə iştirak etməyib və onun “yeganə cinayəti” elmi obyektivlik, vicdanlı araşdırma və mədəni irsi qorumaq olub.

Müxtəlif beynəlxalq insan haqları təşkilatları, o cümlədən BMT məruzəçiləri, İqbal Əbilovu “siyasi məhbus” kimi tanıyıblar.