Validə Əhmədovanın oğlu Elçin Quliyev 2017-ci ildə “Tərtər işi” kimi tanınan hadisələrdə işgəncələrlə öldürülüb. 2024-cü ildə isə Nəsimi Rayon Məhkəməsi Əhmədovaya mənəvi zərərə görə 10 min manat təzminat kəsib.

Aprelin əvvəlində də məhkəmə həmin hadisələr zamanı bir ay işgəncə gördüyünü deyən hərbçi Vüsal Abdullayevə 16 min manat təzminat ödənilməsinə qərar verib. O, iddia ərizəsində 300 min manat təzminat tələb edirdi.

V.Əhmədovanın şikayətindən sonra isə Apellyasiya Məhkəməsi təzminatı 60 min manata qaldırıb, Ali Məhkəmə də qərarı qüvvədə saxlayıb. V.Əhmədova “Toplum TV”-yə deyir ki, borclarını qarşılamaq üçün təzminatla razılaşmalı olub.

“Əslinə qalsa, 60 min yox, milyonlar da ödəsələr, bizə dəyən mənəvi zərəri ödəyə bilməz. Ən azından, heç o təzminatı verməyəydilər, amma məndən ana kimi üzr istəyəydilər dövlət səviyyəsində”, - o qeyd edib.

Yerli məhkəmələr “Tərtər işi” üzrə uzunmüddətli həbsdə qalmış zərərçəkənlərə 120-200 min manat, 3 ilə qədər həbsdə qalanlara isə 30-35 min manat aralığında təzminat kəsir. Həbs olunmayan, lakin həmin hadisələr zamanı işgəncələrlə üzləşmiş şəxslərə isə işgəncəyə məruz qaldığı hər günə görə 500 manat ödənilir.

“Elə insanlar da var ki, prokurorluq onların işgəncə gördüyü günlərin sayını azaldıb. Təsəvvür edin, Tural Kazımov nə işgəncələr görmüşdü. O qədər işgəncələrin qarşılığında ona min manat təzminat kəsmişdilər”, - V.Əhmədova xatırladıb.

V.Əhmədova düşünür ki, hakimiyyətin zərərçəkənlərə olduqca fərqli məbləğlərdə təzminatlar vermsi onların arasındakı birliyi zəiflətmək məqsədi güdüb.

“Bilirsiniz ki, “Tərtər işi” zərərçəkənlərinin hamısı bir idi, onların hamısı Baş Prokurorluğun əli ilə dağıdıldı, parçalandı. Birinə artıq, birinə az təzminat verməklə”, - o əlavə edib.

“Tərtər hadisələri”ni araşdıran istintaq 2021-ci ildə yenilənmiş, Elçin Quliyev də daxil olmaqla dövlətə xəyanətdə ittiham olunmuş bir sıra şəxslər bəraət almışdı. Azərbaycan Xalq Parlamentinin dönəm sədri, siyasi şərhçi Ərəstun Oruclu isə deyir ki, hakimiyyətin “Tərtər işi” ilə bağlı səhvini düzəltməsi üçün hələ edəcəyi çox şey var.

“Tələblər bəllidir. Azərbaycan parlamenti deyilən qondarma Milli Məclis müvafiq qətnamə qəbul edir, cinayətkar cəzalandırılır, Azərbaycan xalqından üzr istənilir, təzminatlar ödənilir, minlərlə hərbçi işinə bərpa olunur. Onlar hərbi xidmətdən hərbi uyğunsuzluğa görə təxris olunub, mülki həyatda da iş tapa bilmirlər”, - o bildirib.

“Tərtər işi”nin istintaqı yeniləndikdən sonra 452 nəfər zərərçəkmiş qismində tanınıb. 13 hərbçi isə işgəncə vermək ittihamı ilə həbs olunub.

Zərərçəkənlər isə həbs olunanların sadəcə əmr yerinə yetirdiyini bildirir, hadisələrin əsl təşkilatçılarının cəzalandırılmasını tələb edirlər. Adı hallanan vəzifəli şəxslər arasında müdafiə naziri Zakir Həsənov, sabiq Baş Qərargah rəisi Nəcməddin Sadıxov, hərbi prokuror Xanlar Vəliyev və başqaları var. Lakin istintaq və məhkəmə bu şəxsləri dindirmələrə cəlb etməyib.