Bakı Ağır Cinayətlər Məhkəməsində dövlətə xəyanətdə ittiham olunan Səbuhi Səlimovun məhkəməsi davam edir. Səlimova qarşı irəli sürülmüş ittihama görə o, İranın xüsusi xidmət orqanlarıyla əməkdaşlıq edib.  Ötən məhkəmə iclasında hakim eyni ittihamla 14 illik həbsə məhkum edilmiş və hazırda cəza çəkən Mehman Rzayevin cəzaçəkmə müəssisəsindən gətirilərək şahid qismində dindirilməsi barədə qərar çıxarmışdı. Bu dəfə həmin şahid dindirilib.

Məhkəmə salonuna qolları qandallı gətirilən Mehman Rzayev deyib ki, Səbuhi Səlimovu tanımır: “Mən bu adamı tanımıram, onunla hər hansı ünsiyyətim olmayıb. Özüm isə iki dəfə Məşhəd ziyarətində olmuşam. İranın heç bir qurumuyla tanışlığım, əməkdaşlığım olmayıb. Həbsimə səbəb partiya sədri Hacı İlhama xidmət etməyim olub”, - o, məhkəməyə bildirib.

Hakim Eldar İsmayılov şahidin ibtidai istintaqa verdiyi ifadəsini elan edib. Mehman Rzayev həmin ifadəsində göstərib ki, İlham Əliyevlə iki dəfə İranda – Məşhəd ziyarətində olub. İlham Əliyev Azərbaycan İslam Partiyasının sədr əvəzi seçildikdən sonra onun tapşırığıyla Bakıda ayrı-ayrı vaxtlarda üç nəfər İran vətəndaşıyla görüşü olub. İranlılar ona içərisində ABŞ dolları əskinazları olan bağlamalar verib, o da həmin bağlamaları İlham Əliyevə sonuncunun mənzilində təhvil verib. Səbuhinin adını da görüşlərdən birində iranlılardan eşidib: “Soruşdu ki, bəs Səbuhi hanı, niyə gəlmir? Mən də soruşdum ki, o kimdir? İranlı Səbuhinin kimliyi barədə mənə heç nə demədi. Mən də soruşmadım”. (Mehman Rzayev elə 2020-ci ilin fevralında iranlılarla “Qarayev” metrostansiyasının yaxınlığında görüşüb pulu götürəndə DTX tərəfindən saxlanılıb. İlham Əliyevlə birlikdə mühakimə olunub. İlham Əliyev də 16 illik həbsə məhkum edilib).

https://toplum.tv/mehkeme/saxta-qetnamelere-gore-mehkeme-qarsisina-cixarilan-hakim-ozunu-teqsirli-bilmir

Hakim şahidin ibtidai istintaqa verdiyi ifadəsini elan etdikdən sonra ondan bu barədə soruşub. Şahidsə deyib ki, o, məcburiyyət qarşısında müstəntiqə iranlıların Səbuhinin xəbər aldıqlarını deyib: “Mən nardaranlıyam, iranlılar da bunu bilirdi, onlar məndən kəndçim olan Hacı Əlikramı xəbər almışdılar. Mən də müstəntiqə belə demişdim. Ancaq müstəntiq məcbur elədi ki, ifadəmdə Əlikramın yox, Səbuhinin adını yazım. Dustaq olduğuma görə başqa yolum qalmamışdı, nə dedilərsə, onu da yazdım”.

https://toplum.tv/mehkeme/prokuroru-hamam-goruntuleriyle-santaj-edenler-mehkeme-qarsisindadir

Şahid tərəflərin suallarını cavablandırdıqdan sonra hakim növbəti məhkəmə iclasını noyabrın 17-nə təyin edib.

Səbuhi Səlimov ötən ilin oktyabrında Dövlət Təhlükəsizlik Xidmətinin əməkdaşları tərəfindən saxlanılıb. Onun barəsində Cinayət Məcəlləsinin 274-cü (dövlətə xəyanət) maddəsi ilə ittiham irəli sürülüb. O, İranın xüsusi xidmət orqanı olan “SEPAH”la əməkdaşlıqda təqsirləndirilir. Özü ittihamı qəbul etmir.