Avropa İttifaqı (Aİ) Rusiyanın Ermənistana qarşı tətbiq etdiyi iqtisadi məhdudiyyətlər fonunda Yerevana dəstəyi artırmağı nəzərdən keçirdiyini açıqlayıb.

Aİ-nin genişlənmə məsələləri üzrə komissarı Marta Kos iyunun 3-də Ermənistanın xarici işlər naziri Ararat Mirzoyanla telefon danışığı aparıb. Ermənistan Xarici İşlər Nazirliyinin məlumatına görə, tərəflər Aİ-Ermənistan ticarət əlaqələrinin genişləndirilməsi imkanlarını və bu istiqamətdə əməkdaşlıq mexanizmlərini müzakirə ediblər.

Marta Kos sosial media hesabında paylaşdığı məlumatda bildirib ki, Avropa İttifaqı Rusiyanın artan iqtisadi təzyiqləri fonunda Ermənistanla həmrəyliyini bir daha təsdiqləyib.

"Qısamüddətli perspektivdə Ermənistana dəstəyin artırılması yollarını araşdırırıq. Həmçinin Ermənistanın region ölkələri ilə iqtisadi əlaqələrini dəstəkləmək üçün Cənubi Qafqaz daxilində və regionla ticarət və enerji əlaqələrinin gücləndirilməsi istiqamətində işi sürətləndirəcəyik", - o bildirib.

Mayın 5-də Ermənistanın baş naziri Nikol Paşinyan Aİ Şurasının prezidenti Antonio Koşta və Avropa Komissiyasının prezidenti Ursula fon der Lyayenlə görüşüb. Görüşdən sonra əlavə iqtisadi yardım paketi açıqlanmasa da, Moskva Yerevanın Avropa İttifaqına inteqrasiya kursuna sərt reaksiya verib.

Rusiya prezidenti Vladimir Putin mayın 9-da bildirib ki, Ermənistan Avropa İttifaqına üzvlük istiqamətində irəliləmək və ya keçmiş sovet ölkələrinin daxil olduğu ticarət blokunda qalmaq arasında seçim etməlidir. Bundan təxminən iki həftə sonra Rusiya Ermənistanın kənd təsərrüfatı məhsulları, mineral su və alkoqollu içkilərinin idxalına məhdudiyyətlər tətbiq etməyə başlayıb.

Rəsmi statistikaya görə, ötən il Ermənistanın xarici ticarət dövriyyəsinin 35,8 faizi Rusiyanın, 11,7 faizi isə Avropa İttifaqının payına düşüb. Ekspertlər hesab edirlər ki, tətbiq olunan məhdudiyyətlər xüsusilə fermerlərə, aqrobiznes şirkətlərinə və alkoqollu içki istehsalçılarına mənfi təsir göstərə bilər.

İyunun 7-də keçiriləcək parlament seçkiləri öncəsi seçki kampaniyası aparan baş nazir Nikol Paşinyan isə hökumətin Avropada yeni ixrac bazarları tapdığını bildirib.