Ermənistan parlamentinin spikeri Alen Simonyan deyib ki, ölkəsi ilə Türkiyə arasında münasibətlərdə irəliləyişin olmamasının səbəbkarı Azərbaycandır. 

O, bunu İstanbula səfəri zamanı Türkiyədəki ermənidilli mətbuat nümayəndələrinə müsahibəsində bildirib. 

“Bir tərəfdən, Azərbaycan bizimlə danışıqlar aparır, digər tərəfdən isə Türkiyənin bizimlə danışıqlar aparmasına imkan vermir. Bu, qəribə vəziyyətdir. Türkiyə sanki bu münasibətlərin girovuna çevrilib", - o qeyd edib. 

Jurnalistlərdən biri Simonyandan Türkiyənin Ermənistanla danışıqlar üçün iyunda bu ölkədə keçiriləcək parlament seçkilərini gözləyib-gözləmədiyini soruşub. Simonyan isə bundan əmin olmadığını deyib. 

“Əvvəlcə deyilirdi ki, Ermənistan və Türkiyə arasında sərhəd Dağlıq Qarabağ məsələsi həll olunana qədər açılmayacaq. Sonra bəyan etdilər ki, Qarabağ məsələsi həll olunub, əvəzində Ermənistan-Azərbaycan sülh sazişi məsələsini gündəmə gətirdilər. Biz saziş üzrə danışıqlar apardıq. Bu, çətin və uzun proses oldu, lakin 17 maddə üzrə razılığa gəldik, paraflamaq üçün görüşdük, əl sıxışdıq, amma yenə də nəticə vermədi", - o bildirib.

Ermənistan və Türkiyə 2022-ci ildən etibarən münasibətlərin normallaşdırılması üzrə prosesə başlayıblar. Bu çərçivədə xüsusi elçilərin görüşləri həm sərhəddə, həm də paytaxtlarda keçirilib. Lakin hələ də diplomatik münasibətlər qurulmayıb və quru sərhəd bağlı olaraq qalır.

2022-ci ildə tərəflər üçüncü ölkə vətəndaşları və diplomatların quru sərhəddən keçməsinə icazə vermək barədə razılığa gəliblər. Ancaq Türkiyə sonradan bəyan edib ki, Ermənistan-Azərbaycan sülh prosesində irəliləyiş Ermənistanla normallaşma prosesində əlavə addımlar üçün ilkin şərtdir. Türkiyə sərhədi ilk dəfə 1993-cü ildə, Birinci Dağlıq Qarabağ müharibəsi zamanı bağlamışdı.

Son yenilik isə 2025-ci ilin dekabrında baş verib. Ermənistan və Türkiyə bu ilin yanvarından etibarən diplomatik, xüsusi və xidməti pasport sahibləri üçün viza prosedurunu “sadələşdirmək” barədə razılıq əldə etdiklərini açıqlayıblar.