“Bəyannamədə böyük ehtimalla dostluq, qardaşlıq mesajları yer alacaq”.

Siyasi şərhçi Elman Fəttah “Toplum TV”-yə açıqlamasında belə deyib.

Türkiyə Böyük Millət Məclisinin sədri Mustafa Şentopun və Pakistan İslam Respublikasının Milli Assambleyasının sədri Əsəd Qeysərin başçılıq etdikləri nümayəndə heyətləri iyulun 26-da Azərbaycana səfərə gəlib.

İyulun 27-də Türkiyə, Azərbaycan və Pakistan parlamentlərinin sədrlərinin iştirakı ilə Üçtərəfli Birinci toplantı başlayır.

Tədbirin yekununda “Bakı bəyannaməsi” imzalanacaq.

E.Fəttah deyir ki, bu bəyannamə deklarativ hadisədir: “Parlament sədrləri protokol üzrə görüşürlər və bir problem yoxdursa, yekunda ortaq bir bəyannamə yayımlayırlar. 

Pakistan, Türkiyə və Azərbaycan münasibətləri hər zaman yaxın və isti olub. Qarabağda hərbi əməliyyatları zamanı Türkiyə ilə yanaşı, Pakistanın da Azərbaycana siyasi dəstəyi göz önündə idi. Bu baxımdan dostluq-qardaşlıq mesajlarını əks etdirən bir bəyannamə mətni ortaya çıxa bilər”.

“Detallı sənədlər dövlət başçılarının və ya xüsusi hökumət nümayəndələrinin görüşləri zamanı ortaya çıxa bilər. Parlament sədrlərinin görüşündəki sənəd daha çox deklarativ mahiyyət daşıyır”,.- deyə ekspert bildirib.

Siyasi şərhçi hesab edir ki, bu bəyannamənin regional əhəmiyyəti var: “Azərbaycan-Türkiyə münasibətləri Qafqazdakı geopolitikiya ciddi təsir göstərir. Azərbaycan və Ermənistan arasındakı düşmənçilik, eləcə də Ermənistanın Türkiyəyə torpaq iddiaları kontekstində Qafqazın ən böyük ölkəsi Azərbaycanın regionun ən böyük dövlətlərindən biri olan Türkiyə ilə yaxın münasibətləri, əlbəttə ki, regional məsələlərə ciddi təsir edir. Üstəgəl nüvə dövləti olan Pakistanın bu ikili dostluğa əlavə töhfə verməsi beynəlxalq əlaqələlərdə də  Azərbaycanla Türkiyənin əlini gücləndirən instrumentdir”.

Parlamentlərarası münasibətlərin iqtisadi baxımdan əhəmiyyətini E.Fəttah belə şərh edib: “Azərbaycanın ixrac məhsulları, xüsusilə də nefti Pakistanı maraqlandırırsa, bu bizimçün iqtisadi baxımdan yaxşı töhfə ola bilər. Pakistanın irihəcmli silah istehsalı sənayesi var. Ola bilər ki, bu, silah ticarətində də öz əksini tapsın”.