Ermənistanın üçüncü Prezidenti Serj Sarkisyan Azərbaycan Prezidenti İlham Əliyevin Suqovuşanda ona ünvanladığı ittihamlara cavab verib. 

"Novosti-Armeniya"-nın oktyabrın 5-də verdiyi məlumata görə, Sarkisyan açıqlamasında Əliyevin özünü "lovğa yeniyetmə" kimi apardığını bildirib.
 
Sarkisyan İlham Əliyevin işğaldan azad olunan Suqovuşan kəndində ona "Kişiliyin varsa, gəl buraya", - ifadəsinə belə reaksiya verib: "Niyə məni 3, yaxud 10 il əvvəl "Artsax Respublikası"nın Mardakert rayonunun Madagiz kəndinə çağırmırdın? Qapalı qapılar arxasında "Məni "Artsax"ın müstəqilliyini tanımağa məcbur edirlər", - deyə gileylənəndə də belə lovğalanardın da.
 
Son üç ildə baş verənlərdən sonra indi özünü təslimçinin (Nikol Paşinyanı nəzərdə tutur-red.) vəkili göstərməyin təəccüblü deyil, onu öz himayənə götürmüsən və əl-ələ tutub mənə hücum edirsiniz".
 
Əliyevin ona fərari deməsinə cavabında isə Sarkisyan özünün I Qarabağ müharibəsindəki rolundan danışıb: "Sənin yaşın eləydi ki, döyüş meydanında olmağa məcburuydun. Sənin harada olduğunu mən bilirəm. Denən, başqaları da bilsin. İndi sənin Ermənistanda yaxşı yoldaşın var - nə qədər ki, vaxt var, onu dəvət elə, o, sənin yoldaşın olmayanda isə mən özüm Madagizə (Suqovuşan-red.) və "Artsax Respublikası"nın istənilən ərazisinə gələcəm".
 
Oktyabrın 4-də işğaldan azad olunan Suqovuşan kəndinə səfəri zamanı İlham Əliyev Sarkisyanı kəskin tənqid edib.
 
"Bu gün mən buradayam, Ali Baş Komandan kimi keçmiş Dağlıq Qarabağ Muxtar Vilayətinin ərazisindəyəm. Serjikin kişiliyi çatırsa, gəlsin bura. O, kişilikdən danışır. Qafqazda kişilikdən danışır. Birincisi Qafqaza bunun millətinin heç bir aidiyyəti yoxdur. Onlar gəlmədirlər, haradan gəliblər, hamı yaxşı bilir. İkincisi, kişilikdən danışırsansa, gəl kişi kimi buraya. Bax, mən burada dayanmışam. Sənin “Madagiz” adlandırdığın Suqovuşanda dayanmışam. Kişiliyin varsa, gəl buraya. Yoxsa orada - İrəvanda oturub banlamaqla özündən qəhrəman düzəldə bilməzsən. Demişəm bir dəfə, hələ sinəsində gəzdirdiyi o dəmir-dümürləri zibil yeşiyinə atsın. Onların heç bir qəpik də qiyməti yoxdur. Ona ən yaxşı cəzanı da erməni xalqı verib, 2018-ci ildə bir təpiklə onu vəzifədən qovub. 2018-ci ildə seçkilərdə növbəti saxtakarlıq törədərək özünə 50 faizdən çox səs yazdırıb. Bu cinayətin şəriki ATƏT-in Demokratik Təsisatlar və İnsan Haqları Bürosudur. Çünki onlar Serjiklə əlbir olaraq, - bilmirəm, sövdələşmə nəyin əsasında olub, amma təxmin edə bilərəm, - onun qələbəsini tanıyıblar. Bu adamı Ermənistanda kütləvi surətdə lağa qoyurlar, ələ salırlar, ona nifrət edirlər. O, seçkilərdə özünə 50 faizdən çox səs yazdırır, özünü baş nazir təyin etdirir və ATƏT də buna göz yumur, buna razılıq verir. Bax, iki saxtakar - biri ATƏT-in Demokratik Təsisatlar və İnsan Haqları Bürosu, hansı ki, Azərbaycana hər zaman xor baxır, biri də Serjik. Nə oldu, sonra erməni xalqı qalxdı. Erməni xalqı qalxıb bir təpiklə onu vurub atdı çölə. Ondan sonra nə etdi? Ondan sonra məzlumcasına gəlib dedi ki, mən haqlı deyildim, Nikol haqlı idi. Özünə kişi deyən adam belə söz deyər?! Özünə kişi deyən adam bu qədər özünü alçaldar?! Bax, bunu belə heç ediblər. Ondan sonra iki il ərzində ağzına su alıb susmuşdu. Nə qədər onu təhqir etdilər. Nə qədər onun cinayətkar qohumlarını həbs etdilər. Xaricdə gizlənmiş və Kolumbiyanın, ya da Qvatemalanın pasportunu almış bir yaxın qohumu var, adını da dəyişdirmişdi. Necə ki, vaxtilə Serjik özünü “Serj” edib. Qohumu da özünə bir ad verib – “Qonzales”. Qulağından tutub gətiriblər və həbs ediblər. Qorxusundan susub, nə desin? Müharibədən sonra yenə baş qaldırır. Müharibə olmasaydı, bu acı məğlubiyyət olmasaydı, Serjik də indi həbsxanada idi. Onun kimi oğru bizim bölgədə bəlkə də hələ doğulmayıb", - deyə Azərbaycan Prezidenti bildirib.