Məktəbdə uşağın döyülməsi ilə bağlı video sosial şəbəkələrdə yayıldıqdan sonra polis araşdırma başlayıb. Lakin döyülən şagirdin atası Namiq Zeynalov araşdırmanın gedişindən narazıdır. “Toplum TV” yə açıqlamasında o bildirib ki, hələlik oğlunu döyən uşağa şifahi töhmət verilib və başqa heç bir tədbir görülməyib.

Valideyn bildirib ki, məktəb rəhbərliyi uşağın döyüldüyünü ona xəbər verməyib. O videonu sosial şəbəkələrdə gördükdən sonra xəbər tutub.

Sosial şəbəkələrdə Bakıda məktəblərdən birində şagirdin sinif otağında məktəbli yoldaşı tərəfindən döyülməsinin görüntüləri ötən gün yayılıb.

Bundan sonra Bakı Şəhər Təhsil İdarəsi valideynlərdən izahat alındığını, psixoloqların uşaqlarla söhbət apardığını bildirib.

https://toplum.tv/sosial/112-sayli-sagirdin-bulinqe-meruz-qaldigi-bildirilir

Sabunçu rayon 119 saylı məktəbin direktor əvəzi Lətifə Mustafayevə isə fərqli açıqlama verib, o bildirib ki, uşaqlar barışıb, hər şey qaydasındadır. Hadisənin ictimailəşməsinin səbəbi isə şagirdlərdən birinin məktəbə iki telefon gətirməsi olub:

“Dərs başlamazdan öncə şagirdlərdən telefonlar təhvil alınır və onlar xüsusi şkaflarda saxlanılır. Telefon şagirdlərə yalnız evə getdikdə verilir. Sadəcə olaraq videonu çəkən uşaq məktəbə iki telefon gətirib. Birini təhvil verib, o birinisə gizlədib. Şagirddə telefonun olduğunu sinif rəhbəri və sinif yoldaşları bilməyib. Məsələ araşdırılır, həm uşaqların, həm valideynlərin izahatı alınıb. Həmçinin, məktəbə Bakı Şəhər Təhsil İdarəsindən psixoloqlar göndərilib”.

https://toplum.tv/sosial/qebul-imtahanlarinda-yuksek-bal-toplayanlarin-sayi-aciqlanib

Daxili İşlər Nazirliyinin sözçüsü Elşad Hacıyev bildirib ki, zərərçəkənin xəsarətin dərəcəsini müəyyənləşdirmək üçün tibbi ekspertiza təyin olunub. Hazırda faktla bağlı araşdırmalar davam etdirilir.

Şagirdin atası  Namiq Zeynalov isə verilən açıqlamalardan razı deyil.

“Bu o deməkdir ki, ikisi də eyni məktəbdə oxumağa davam edəcək. Bəlkə uşağımı bıçaqlayardı, vurub kor edərdi. Onda necə olacaqdı? Polis videonu çəkənə dəymir, döyənə dəymir, müəlliminə dəymir.  Qohum gəlib mənə xəbər atır ki, uşağınızı döyüblər, bölməyə gəlsin”.  

Namiq Zeynalov  bildirib ki, əgər zorakı şagird, müəllim və məktəb barədə tədbir görülməsə, başqa çıxış yolu axtarmalı olacaq.